Cant

Un article de Wikipèdia, l'enciclopèdia liura.

Lo cant representa l'ensemble de la produccion de sons musicals amb l'ajuda de la votz. La persona que produtz lo cant es apelada cantaire.

Lo cant resulta de l'accion del buf : l'aire es expulsat dels palmons per l'accion del diafragma, coma per una expiracion normala, e fa vibrar las còrdas vocalas. Lo son atal produch es en seguida amplificat per las cavitats naturalas (nas, sinus, torax), e eventualament articulat per la lenga e los pòts per formar de sillabas.

En fach, lo cant fa apèl a totas las ressorças del còs uman : lo sistèma respiratòri es utilizat, mas tanben matun muscle amb de foncions divèrsas, las del ventre, de l'esquina, del còl, de la cara. Es una de las activitats mai complètas que siá perque exigís una consciéncia del còs sus totes aquestes plans. Se parla sovent d'un entraïnament musical e dins una cèrta mesura un entraïnament esportiu perque per facilitar lo trabalh de totes aquestes muscles, entre autre dobrir la via a l'aire que sortís del còs e permetre als palmons de se dilatar al maximom, Cal susvelhar sa postura. "La caissa toracica deu èsser doberta, las espatlas regetadas en rèire e la colona vertebrala ben drecha." Mas per dessús tot, coma un entraïnament esportiu, lo cant "exigís un bon tonus muscular e nos oblija a melhorar nòtre igièna de vida - plan manjar, far d'exercici, evitar lo tabac e los excèsses d'alcool, etc...- per far de progrèsses e los manténer."

Mas cantar es pas solament se servir de sa votz e de son còs, es tanben interpretar, far partejar al public las emocions contengudas dins lo tèxt cantat : es en aquò que, en foncion dels genres musicals sollicitats, lo cant rejonhís frequentament l'art de la scèna.

En musica classica, la votz es sovent utilizada coma un instrument de musica a part entièra. Dempuèi mantun sègle, lo cant classic a inspirat fòrça compositors que li an dedicat divèrs genres musicals : cançons polifonicas, messas, motets, coralas, cantatas, opèras, oratorios, melodias, etc.