Faissisme
Un article de Wikipèdia, l'enciclopèdia liura.
Lo faissisme (reg. faishisme) (de l'italian fascismo, de fascio "fais", simbòl de poder roman) es una ideologia politica d'extrèma drecha e una practica de govèrn que se caracteriza per l'autoritarisme, amb la concentracion del poder dins las mans d'un dictator, pel chauvinisme nacional extrèm associat al racisme, pel corporatisme, pel militarisme, per l'antiliberalisme e per l'anticomunisme.
Lo "faissisme" es mai que mai lo regim que coneguèt Itàlia sota la dictatura de Benito Mussolini de 1923 a 1945. Per extension, se parla tanben de "faissisme" per caracterizar de regims pròches del de Mussolini coma lo nazisme d'Aldolf Hitler en Alemanha de 1933 a 1945, lo franquisme de Francisco Franco en Espanha de 1939 a 1975, eventualament lo regim de Pétain en França de 1940 a 1944 e tanben divèrses autres regims d'Euròpa durant lo sègle XX.
Se classifica dins lo "faissisme", e pus exactament dins neofaissisme, los movements politics contemporanèus que s'inspiran d'aqueles regims o que ne son nostalgics.
[Modificar] Emplecs abusius
Un emplec abusiu del tèrme "faissista" consistís a l'aplicar a totes los corrents de l'extrèma drecha, mentre que lo faissisme es solament un corrent istoric plan precís d'extrèma drecha. Un autre usatge abusiu es de qualificar de "faissista" tota persona, movement o actitud supausats autoritaris, e mai s'an pas cap de relacion amb lo faissisme istoric. Aital "faissista" e "faissisme" son una etiqueta plan frequenta per disqualificar un adversari quin que siá dins la vida sociala. Aquel biais retoric se sarra de la reductio ad hitlerum.
