Jan dau Melhau
Un article de Wikipèdia, l'enciclopèdia liura.
Jan dau Melhau es un autor-contaire-editor-chantaire-musician lemosin. Nascut a Limòtges en 1948, fuguet un daus principaus resvicolaires de la chançon occitana de las annadas 1970-1980.
Mas sa lemosinitat, 'qu'es a dire son biais de veire e de viure las chausas, la natura, las bestias, los òmes e la mòrt ne'n faguet un pauc un chantaire marginau. 'Laidonc aguet pas lo succès, la reconeissença mediatica coma Joan-Pau Verdier o d’engueras Claudi Martì e Patric, mas Melhau zo cherchava pas, zo desirava pas. S’era desja, a ‘quel’epòca, retirat dins la prunda campanha lemosina ente s’es mai inspirat de la natura, dau monde que li vivia e de lors misteris que de las revòutas e lutas ciutadanas o pan-occitanas…
Autor e editor de belas letras lemosinas (coma Marcela Delpastre o Pau-Lois Granier), eu s'interessa a la beutat de la lenga subretot, a sa fòrça literaria. Sa demarcha a pas jamais estat de far de folclorisme ne de chantar davant un plen Zenith, mas de 'nar fossinar au mai prund de la lenga occitana tota sa finessa, tota sa complexitat. Contunha auei d'obrar per lo lemosin emb son ostau d'edicion Lo Chamin de Sent Jaume (Meuzac) e sos spectacles de contes e de chançons.
