Lioluca Urlannu
Di Wikipedia, l'enciclopedìa lìbbira.
Lioluca Urlannu (oppuru Leoluca Orlando) (Palermu, 11 di austu 1947) è n'omu pulìticu sicilianu.
Lauriatu 'n Jurisprudenza, avvucatu e ducenti a l'Universitati di Palermu. Fici li sò studi a Heidelberg (Girmania) e ntâ Nghirterra.
Cunzigghieri jurìdicu dû Prisidenti dâ Riggiuni Siciliana Piersanti Mattarella dû 1978 ô 1980, hà statu cunzigghieri cumunali di Palermu dû 1980 ô 1993, ntê squatri dâ Dimucrazzìa Cristiana, unni veni a scuntràrisi cu li capi. Addivinìu sìnnucu di Palermu dû 1985 ô 1990, diriggennu na cualizzioni diciuta "esaculuri". Eliggiutu cunzigghieri cumunali ntô 1990 cu chiossai di 70.000 prifirenzi, l'annu appressu lassa jiri la DC prumuvennu la nasciuta di La Riti-Muvimentu pâ Dimucrazzìa.
Eliggiutu nti l'Assimbrea Riggiunali Siciliana ntô 1991 (d'unni si nni nesci lu stissu annu) e ntâ Càmmira dê Diputati ntô 1992 cû sò muvimentu.
Ntô 1993, cô primu giru di elizzioni diretta, torna a èssiri sìnnucu di Palermu cu chiossai dû 75% dê prifirenzi. Vinni cunfirmatu dû novu comu sìnnucu ntô 1997. Lu pirìudu dâ sò sinnacatura, puru ammenzu a dicisioni diffìcili, veni di assai genti arricurdatu comu la "Rinasciuta di Palermu", macari pô mpurtanti travagghiu di prumuzzioni e ricùpiru dâ mmàggini dâ cità nti l'Italia e ntô munnu, ca avìa nisciuta assai allurduta dâ lonca seria di straggi e crìmini mafiusi dû 1993.
Dû 1994 ô 1999 fu diputatu ô Parlamentu Eurupeu. Porta lu sò muvimentu a tràsiri nta Li Dimucràtici di Rumanu Prodi e quinni nti La Margherita.
Ntô 1996 vinni accusatu e innacatu pi curruzzioni aggravata ntê sò funzioni di sìnnucu di Palermu. Lu pintutu Tulliu Cannella furnìu nu scinariu nquitanti dicennu ca ntô 1986 lu Cumuni di Palermu, doppu na tangenti di 200 miliuna di liri, s'accattau li appartamenti nu certu Giuseppi Bunannu, nu pristanomu di Gaspari Finocchiu (mprinnituri) ca era ntricatu ccâ mafia. Distinatari dâ tangenti, secunnu lu pintutu, èranu lu sìnnucu Lioluca Urlannu e l'assissuri Vicenzu Nzirillu, ca a l'èbbica dê fatti ncarziratu già di 16 misi pi mafia.
Si nni niscìu dû rolu di sìnnucu ntô dicèmmiru dû 2000 pi cuncùrriri, comu candidatu dû centru-manca â prisidenza dâ Riggiuni Sicilia, a l'elizzioni riggiunali dû giugnu 2001, unni vinni scunfiggiutu (cu 36,6% contru lu 59,1%) di Totò Cuffaru, cugghiennu cumunqui nu bonu nùmmiru di prifirenzi diretti. Turnau a l'Assimbrea Riggiunali Siciliana dû 2001 ô 2006.
Pi uccasioni di l'elizzioni primari di l'Unioni, ntô 2005, pi dicìdiri lu candidatu prisidenti dâ riggiuni pê riggiunali dô 2006 si metti a favuri di Rita Bursillinu, sciarriànnusi chê pusizzioni ufficiali di La Margherita ca sustinìanu a Firdinannu Latteri. Jittatu fora dû partitu s'avvicina a Italia dê Valuri di Antonio Di Pietro, cu chistu capulista nti diversi circuscrizzioni torna â Càmmira dê Diputati.
Ntô maju 2006 annunzia la sò ntinzioni di purtari la sò candidatura ê primari di l'Unioni pâ scigghiuta dû candidatu sìnnucu di Palermu, ca si svurgeru lu 4 di frivaru 2007, unni arrisurtau lu primu di l'eliggiuti cu 71,92% dê prifirenzi, distanziannu di assai li diretti rivali Alissantra Siragusa (20,13%) e Giustu Catania (7,92%).
Sustinituri dû Partitu Dimucràticu, s'hà mpignatu sempri contru la mafia, nzèmmula a àutri battagghi civili (comu chidda contru la pena di morti). Nun ammàncanu magari chiddi ca l'hannu criticatu, primu ntra tutti lu scritturi Liunardu Sciascia, ca spissu lu accùsanu di mittiri 'n capu a tinnenzi justizzialisti.
Hà statu prisidenti dû Stitutu pâ Rinasciuta di Palermu.
