Lesinia
Da Wikipedia, ła ençiclopedia libara.
|
Sto articolo l'è scrito en diałeto veronexe
|
La Lesìnia l'è na zona giografica che la se tróva par la majior parte in teła provincia de Verona e un tochetìn anca in cueła de Vicenzsa. L'è praticamente un tòco de łe Prealpi Venete quasi par conto suo: a Nord l'è serà dała Val dei Ronchi, beła fonda e selvajia, e dal maestoso grupo del Carega, a Est dała Val del Leogra, a Sud dal corso dell’Adexe e dal'alta pianura veronese e a Ovest dała Val d'Adexe. L'è solcà da un saco de vałi che dai pascoli piassé alti le va zó e le se destende a ventajio verso Verona e la pianura. Andando da Ovest verso Est, catémo le vałi de Fumane, de Maran e de Negrar (che tute insieme le fa la Valpolesela, che però l'è na definizsion storica pitòsto che giografica), e dopo la Valpantena, el vajo de Squaranto, la val de Mezàne e cueła de Illasi, la Val Tramegna, la Val d'Alpone, la Val de Chiampo e la Valdagno. Le cime a Nord-Ovest le va dai 1500 ai 1800 metri, el grupo del Carega a Nord-Est invezse el supera i 2200, mentre la zona centrałe la stà tra i 1000 e i 1300 metri.
