Frans-Vlams

From Wikipedia

Pars Flandriæ Teutonicæ occidentalior - koarte van 1645

Blaeu 1645 - Galloflandria in qua Castellaniæ Lilana Duacena & Orchiesia cum dependentibus necnon Tornacum & Tornacesium - koarte van 1645

Et Frans-Vlams (Nederlands: Frans-Vlaams) es de oorsproenkelyke West-Vlamsche streektoale van de Vloamiengn in 't noord'n van Vrankryk. Frans-Vloandern makt deel uut van 't Fransche departement Nord-Pas-de-Calais. De Fransche Vloamiengn noemn under oorsproenkelyke streektoale nuuze Vlaamsche tale of et Vlemsch.

[bewerk'n] Toestand

Tot an den Twidd'n Weireldôorloge sproak'n ze courant West-Vlams in Frans-Vloandern. Sinsdien es 't styf achteruut gegoane. Ollene nog oedere menschn up de buutn ken et nog. Volgens en onderzoek deur de EU^[1] zyn d'r nog apeupres 20 000 doagelykse sprekers en rond de 40 000 occasionele sprekers. De joenge Frans-Vloamiengn spreek'n et "Vlams van over de schreve" elegansn nie mei. Ze zyn meer geïnteresseerd in Nederlands om werk te viendn bie nuus.

De verwachtiengn vo 't Frans-Vlams zyn ronduut slicht. Tegen de volgende generoasje goat bykan niemand niemand et nog spreek'n. D'Akademie voor Nuuze Vlaamsche Tale probeert 't ty te doen keern deur 't organiseern van cursussn Vlaams. In 2006 woarn d'r meer of 300 studentn, surtout grote mienschn die in 't Frans zyn upgebrocht moa die de toale van under ouders were willn leern kenn'n.

[bewerk'n] Stoatus

't Vlams in Vrankryk eit gin één wettelijke stoatus of omkoaderienge bekomm'n van de Fransche regerienge. D'r komm'n dus ook gin initiatievn uut van de Fransche overeid om 't Vlams t'ondersteun of up te wardeern.

[bewerk'n] Verenigiengn

Recentelyk zyn der wel nen oop privoate verenigiengn ontstoan die trachtn de Vlamsche toale, cultuur en tradisjes were te doen erleevn:

ANVT: Akademie voor Nuuze Vlaamsche Tale
MDSK: Vlaanderen in Frankrijk met de Michiel de Swaen-kring
Het Reuzekoor: cultureel-muzikoale verenigienge
Yser Houck: verenigienge vo de beschermienge van 't istorisch patrimonium van Volckerinckhove en omstreek'n
De Katjebei: verenigienge vo d'eruplevienge van de Vlamsche cultuur in Vrankryk
Le Comité Flamand de France
SOS Blootland
Menschen lyk wyder: Volkstoneel vo Frans-Vloandern
Flor Barbry's Volkstoneel voor Frans-Vlaanderen
Association Foirante

Die verenigiengn zyn dikkers folkoristisch. Sommigste verenigiengn oud'n nie lange uut, lyk et ter ziele gegoane Tegaere Toegaen da upgericht wos vo Vlams onderwis te geevn in colleges.

Jean-Louis Marteel, nen activist uut Duunkerke, eit ne cursus^[2] over 't Vlams (fonetisch) uutgegeven, geschreven in 't Frans. Zie ook de koppeliengen vo een stukske uut dien boek.

Je kut oek ne cd besteln ip de site van 't ANVT, a'j de poahina in 't Frans zet, ku'j doa stikskes van worn.

[bewerk'n] Hedendoagse literature

Jean-Noël Ternynck es nen Frans-Vlamschn dichter die in 't Vlams schrift en cultureel styf actief es.

[bewerk'n] Muzikantn

Maryse Collache uut Duunkerke
Raymond Declercq uut Coudekerque
Het Reuzekoor, en 35-koppig gezelschap uut Duunkerke
Edmonde Vanhille uut Duunkerke

[bewerk'n] Radio

Radio Uylenspiegel zendt 10 % van under tyd uut in 't Vlams. Ze zendn uut vanuut Kassel up 91.8 FM.

[bewerk'n] Woord'nboek

Cyriel Moeyaert, oud-voorzitter van het Komitee voor Frans-Vlaanderen, eit vichtig joar lank et Vlaamsch in Vrankryk beluusterd en up papier gezet. 't Es moa in 2005 dat 'n zynen Frans-Vlamschn woord'nboek^[3] eit uutgebrocht.

[bewerk'n] Externe koppeliengn

[bewerk'n] Referesjn

↑ http://ec.europa.eu/education/policies/lang/languages/langmin/euromosaic/fr6_en.html
↑ "Cours de Flamand, Het Vlaams dan men oudders klappen, Méthode d'apprentissage du dialecte des Flamands de France (Westhoek)", 1992, Dunkerque, Miroirs Éditions, Het Reuzekoor, ISBN 2-84003-005-5, 447 pp.
↑ Woordenboek van het Frans-Vlaams, Uitgeverij Davidsfonds Literair, 2005, ISBN 97 890 6306 5270

Dat artikel es oorsproenkelyk geschreevn in 't Werviks.

Retrieved from "http://vls.wikipedia.org../../../f/r/a/Frans-Vlams_d0c4.html"

Categories: Geschreevn in 't Werviks | Toale