Yves Bondue
From Wikipedia
Yves Bondue (Yper, 1 moarte 1966) is un componist, acteur, muzikant, zanger, tekstschryver, kortom un muzikale duzendpôot.
[bewerk'n] Leev'n
Yves Bondue is werkzaam ip verschillende theoaterfroenten. An den ène kant ist ie un componist die oal styf veel priezen gekregen eet vo zun werken, zowel in Vloandern ols in ’t bûteland, toe in Rûsland toe. Je schreef voa kamerorkesten, voa koaren (je was oak un tyd koarleider van ut strijdkoar ‘Vamos Pro Lutar’) toet zelfs un opera.
Ols tonèèlmens speeldet ie ol in verschillende tonèèlstikken vo volwassenen, oender andere me Anton Coogen, mo je was ook ol up de Gense Fèèsten en in verschillende culturele centra met zun stikken van ‘Mol en Muis’ vo kienders.
Ols muziekpedagoog ield ie verschill’nde muziekworkshops vo gezinnen ‘Kun je de mieren horen zingen?’ en ‘De Schaduw van de Kleurenvanger’ en je deed oak verschill’nde gastcolleges an de vele pedagogische oge schol’n in Vloandern. Me zun workshops ‘Folkdans’ oender de name ‘Het Eiland van de Tovercirkel’ wast ie ip ’t folkfestival van Dranoeter.
Je stot ol me styf veel van zun muziek ip CD’s van un ander, moa verleden joare eet ie un eigen CD ûtgebrocht ‘Sjchrijeuw et L'histoire du vélo vert‘, womee dat ie zelfs upgetred’n eet ip et RazzMatazzfestival, un folkfestival in Olland. Vot moment zien de ipnamen bezig van zun twèède CD. Zun muziek is folkachtig, mo nie echt folk, chansonachtig mor ook nie echt chanson.
Je kunt em vo ’t moment ook bewoenderen me zun vertelwandeliengen in den omtrek van ’t Folk in Dranoeter wo dat ie un fakkeltocht combineert me verhalen, accordeongmuziek en liedjes over un Rûs die ier in West-Vloandern blûven angen is achter den èèste wèreldorloge.
