Omnivoor

vanuit Wikipedia, die vrye ensiklopedie.

'n Omnivoor (vanaf die Latyn: omne wat die hele ding of alles -- in die meervoudsvorm -- beteken; en vorare wat om te sluk, of om op te vreet beteken) of alleseter is 'n dier wat beide plantmateriaal en vleis eet. Omnivore vertoon nie die gespesialiseerde gedrag van die karnivore of die herbivore nie; hulle soek wyd en syd na voedsel en is dus minder kwesbaar vir veranderinge in hul ekologiese sisteem. Die spysverteringstelsels van hierdie diere toon dieselfde veelsydigheid: hulle is in staat om plantkomponente soos herbivore te verteer, maar is terselftertyd geredelik in staat om proteïen en die ander voedselkomponente van vleis te verwerk en te absorbeer. ^[1]

Breingrootte korreleer met die kwaliteit (voedselwaarde en hoeveelheid kalorieë) van die kos wat ingeneem word. Omnivore het volgens dié definisie 'n hoë kwaliteit dieët. Oor die algemeen is die groep omnivore intelligent. Voorbeelde hiervan is die merkwaardige intelligensie wat vertoon word in die voedselbymekaarmakingsgedrag van die beer en die kraai. Die geskiedenis van menslike ontwikkeling toon dat die aanvulling van die dieët met vleis die ontwikkeling van aansienlik groter breins toegelaat het. 'n Groter brein vereis die verbruiking van groot hoeveelhede energie en voedingstowwe. ^[2]

(Daarteenoor bestaan 'n ander wetenskaplike argument egter wat, veral in die werk van die antropoloog Richard Wrangham, en kollegas van die Harvard Universiteit, teoretiseer dat dit die inname en kook van wortelagtige groente was wat die ontwikkeling van groter breine tot gevolg gehad het, asook die ontwikkeling van kleiner tande, die hedendaagse proporsies van die ledemate en selfs die band tussen man en vrou). ^[3]