Bümpliz
Us der alemannische Wikipedia, der freie Dialäkt-Enzyklopedy
Dr Name Bümpliz chunnt, wie Historiker ebe aanääh, uursprünglech us em Keltische. Lut römische Übrliferige het di erschti Vorposchte vo de Römer am Stadbach "Pimpeningis" gheisse. Es isch aaznäh, dass d Römer ire Vorposchte dört ersteut hei, wo's bereits e kelitischi Sidlig ggäh het. D'Übrräscht vo dere römische Aalag fingt me als restaurierti Ruiine bir 13er Böss-Station "Poscht" ungeremne Buurehuus (wo mittlerwile als Bibliothek fungiet) ir Nööchi vom Schloss Bümpliz. (Ds Schloss Bümpliz het uursprünglech im Mittuauter als Residänz vo dr savoyische Chünigin Bertha dient. - Bis zur Reformation vo Bärn ca. 1526 - quasi bis zur Eroberig vom Waadtland - hei d Gebiet weschtlech vor Stadt Bärn zum savoyische Riich ghört. Drum fingt me vili Urkundene oder süschtigi wichtigi Dokumänt usem mittuauterleche Bärnbiet im Historische staatsarchiv ds Turin, Italie) - Ds Weyerli isch übrigns früecher e Foräuezucht gsy wo, d Chünigin Bertha Fisch züchtet het.
Bümpliz giut mit übr 34tuusig Ywohner aus ds grösschte Ussequartier vo Bärn und beinhautet unger angerem d Teile Bethlehem, Stapfenacher, Stöckacher, Hohliebi, Gäbubach, Schwabguet, Tscharnerguet, Obrmatt, Chleefäud, Schlossguet, Weyermannshuus, Hööchi und Bodeweid.
Bümpliz isch berühmt für si hööch Uusländeraateil, wo öppe bi 49% litt. I de 80er- und früeche 90er-Jahr het Bümpliz e zimlech schlächte Ruef gha (Schwyzwitt), vor Auem wäg de riesige, modärne abr umstrittene Betton-Blöck, wo mit günschtige Mietine ungerprivilegierti Schichte (vor auem usländischi Saisoniers) aazoge hei und wäg dr Kriminalität, verstercht dür ne zimlech breit uusgleite HipHop-Szene.
Kulturell gseh het Bümpliz enorm viu zur bärner Kultur biitreit. So het dr Carl Albert Loosli lang z Bümpliz gwohnt und gwürkt, d berüehmti MondartRock-Gruppe Patent Ochsner sy ursprünglech Bümplizer, und es chöme vili bekannti HipHop-Crews und Rap-Artist us Bümpliz, wie z.Bsp. Dr LUL DXE, Whodis?, 7962 und dr Produzänt Elwont.
| Sälle Artikel oder Abschnitt brucht e Yberarbeitig un sott dorum durgluegt werre. Nächers isch uf dr Diskussionssite agäbe. Hilf bitte mit, ihn z'verbessere un entfern aschliessend die Markierig. |
