Ziefen

Us der alemannische Wikipedia, der freie Dialäkt-Enzyklopedy

Wappe

Basisdate
Kanton:	Basel-Landschaft
Bezirk:	Liestal
BFS-Nr.:	2834
PLZ:	4417
Koordinate:	47° 26' n. Br. 7° 43' ö. L.
Höchi:	423 m ü. M.
Flächi:	7.80 km²
Iwohner:	1462 (31. Dezember 2005)
Websyte:	www.ziefen.ch
Charte

Technische Yschränkung:
Dr koräkt Titel wär: »Ziefe«

Dialäkt: Baseldytsch

Ziefe (hochdytsch Ziefen) isch e politischi Gmeind im Bezirk Lieschtel vom Kanton Basel-Landschaft in dr Schwiiz.

[ändere] Lag

Ziefe liggt im Tal vo dr hintere Fränke (Reigetschwylertal, Föiflibertal) zwische Buebedorf und Reigetschwyl uff 423 m. ü. M. Witeri Nochbergmeinde sin Lupsige, Arbetschwyl unds soledurnische Seewe.

[ändere] Wappe

Sit 1943 ziert en liigende schwarze Adler mit goldige Fäng und Schnabel uff silbernem G rund s Wappe vo Ziefe. Es isch s Wappe vo de Eptiger vo Ziefe, wo uff enere Glasschiibe vo 1583 zgseh isch.

[ändere] Gschicht

Ziefe isch e ehemooligs Siidebandwäber- und Buuredorf im hintere Föiflibertal (Föifliber wäg dr Posamänterei). 1226 taucht dr Ort als Civienne s'erschte Moll in de Urkunde uff. Dr Name isch megligerwyys galloreemischem Ursprungs. Uff em Chilchbrg, wo hytte d Chile stoot (erwäänt ab 1302), hett im 14. Joorhundert e Burg thront, wo vomene Sitestamm vo de Eptiger mit em Zuesatzname Zivienner bewohnt worde isch. 1400 isch s Dorf mit em gsamte Amt Waldeburg an d Stadt Basel ybergange. 1798 hett Ziefe zem Bezirk Lieschtel gwäggslet. 1565 hett d Pescht 211 Mensche s Läbe koschtet. Im 19. Joorhundert hett Ziefe vor allem vo dr Siidebandwäberei gläbt. 1880 sin in Ziefe 244 Wäbstiehl gstande. Mit em Niidergang vo dr Posamänterei ischs au mit Ziefe durab gange. Mit em Bauboom in de 1970er Joor hett sich Ziefe widr erholt. Hytte hetts vili Eifamiliehüser und im flache Talgrund Richtig Buebedorf au diversi Induschtrii.