Pietro III d'Aragón
De Biquipedia
|
||
| Informazión | ||
|---|---|---|
| Rei en |  Aragón |
|
| dende | 1276 | |
| dica | 1285 | |
| Prezedito por | Chaime I | |
| Suzedito por | Alifonso III | |
| Naximiento | 1239 | |
| Muerte | 2 de nobiembre de 1285 | |
Pietro III d'Aragón u Pero III d'Aragón, dito lo Gran (*1239 – † 2 de nobiembre de 1285). Fillo de Chaime I lo Conqueridor y a suya segunda muller Biolán d'Ongría, suzedió á lo suyo pai en 1276, en os tetulos de rei de Aragón, rei de Balenzia (como Pietro I), y conde de Barzelona (como Pietro II).
Casato lo 13 de chunio de 1262 en a Seo de Montpeller con Constanza de Hohenstaufen, filla y eredera de Manfredo I de Sizilia, estioron coronatos en Zaragoza en una zerimonia en a cuala Pietro canzeló lo basallache que eba achustato con o Papa o suyo paye Pietro II.
Tot o suyo reinato se zentró en a esbandidura d'a Corona d'Aragón por o Mediterranio y ta ello aprobeitó o suyo matrimonio con Constanza ta pedir a corona siziliana.
Sicilia se trobaba dende 1266 baxo a soberanía de Carlos d'Anjou qui, con o emparo d'o papa Clemente IV que no deseyaba á dengún Hohenstaufen en o sur d'Italia, eba estato imbestito rei dezaga de redotar, en Benevento, á Manfredo qui murió en a baralla.
En 1279 una flota d'a corona aragonesa, á lo mando de Conrado Lanza, recorre as costas africanas ta retornar a soberanía feudal d'Aragón sobre Tunisia que a muerte d'o emir Muhammad I al-Mustansir eba debilitato. Posteriormén, en 1281, Pietro III armó una flota para embadir Tunisia y demandó á lo rezién eslexito papa Martín IV una bula que declarará la operazión melitar como cruzada; pero lo papa, d'orixen franzés y partidario de Carlos d'Anjou, li'n negó.
Cuan a flota iba á salir, acayezioron en Sizilia as clamatas Bispras sizilianas que prebocoron a espulsión d'a isla, dezaga una gran matanza, d'os franzeses. Os sizilianos nimbioron allora una embaxada ta Pietro III ofrexiendo-li a corona siziliana á cuala teneba dreito grazias á lo suyo matrimonio. O rey aragonés puso allora la suya flota endrezera ta Sizilia an i plegó lo 30 d'agosto de 1282 y an estió coronato rei en a ziudá de Palermo.
Á l'inte nimbió una embaxada ta Carlos d'Anjou, que se i trobaba en Mesina, demandando-li qie li reconoxiera como rei de Sizilia y albandonara a isla. A redota d'a flota angebina en Nicoreta por l'almirán Roger de Lauria, obligó á Carlos á dixar Mesina y cubillar-se en o suyo reino de Nápols.
O papa Martín IV respondió á la coronación siziliana de Pietro III con a suya escomunión (9 de nobiembre de 1282) y a suya deposizión como rei de Aragón (21 d'abiento de 1283), ofrexiendo a corona á lo segundo fillo d'o rei de Franzia, Carlos de Balois, á quin imbistió lo 27 de frebero de 1284, y declarando una cruzada contra Aragón. A situación en a que se trobó Pietro III yera totalmén inestable, antimás de tener que enfrentar-se á la embasión franzesa que se yera preparando á lo norte d'os Perinés, tamién abió d'enfrentar-se á graus problemas en o interior d'os suyos reinos surtitos por as nezesidaz economicas que a conquista de Sizilia prebocó.
Pietro III soluziona os problemas internos premitiendo, en 1283, a formazión d'a Unión aragonesa y churando lo "Pribilexio Cheneral" que esfendiba os pribilexios d'a nobleza; y atorgando á Cataluña la constituzión "Una vegada l'any" en as corts zelebratas en Barzelona entre 1283 y 1284.
Soluzionatos os problemas interiors pudo meter ficazió en a embasión franzesa, que á lo mando d'o propio rei franzés Zelipe III, prenió en 1285 a ziudá de Chirona, ta aber de retirar-se cuan a flota aragonesa tornó de Sizilia á lo mando de Roger de Lauria y redotó á lo exerzito franzés.
Dezaga la suya gran bitoria, Pietro III s'iba a enfrentar á lo suyo chirmán Chaime II y á lo suyo sobrín o rei Sancho IV de Castiella que no li eban aduyato mientres o suyo conflicto con os franzeses, pero a suya muerte prematura, o 11 de nobiembre de 1285, lo impedió.
De o suyo matrimonio con Constanza naxioron os siguiens fillos:
- Alifonso III d'Aragón (1261-1291), rei d'Aragón, Balenzia, Mallorca y conde de Barzelona.
- Chaime II d'Aragón (1267-1327), rei d'Aragón, Balenzia, Mallorca, conde de Barzelona, rei de Zerdeña y de Sizilia.
- A infanta Isabel d'Aragón (1271-1336), Santa Isabel de Portugal, reina consorte de Portugal por o matrimonio en 1288 con Dionisio I de Portugal.
- Federico II de Sizilia (1272-1337), rei de Sizilia.
- A infanta Biolán (1273-1302), casata en 1297 con o infán Roberto de Nápols, futuro Roberto I.
- O infán Pietro d'Aragón (1275-1291).
| Prezedito per: Chaime I |
Rei d'Aragón | Suzedito per: Alifonso III |
