Budismu
De Uiquipedia
El budismu ye la relixón, la filosofía, y discutiblemente la psicoloxía, desendolcada de magar les enseñances difundíes nel norte de la India por Siddharta Gautama, conocíu como'l Buda, alredor del sieglu V edC.
Buda nun ye nin un dios, nin un mesíes nin un profeta, y el budismu nun postula sobro un creador. Buddha ye un títulu nos antiguos idiomes pali y sánscritu, cuyu significáu ye "el qu'espertó". Nel budismu'l términu nun sólu s'usa pa referise al personaxe históricu, sinón tamién pa referise a cualaquier otra persona qu'igualmente tenga realizáu lo que se considera como'l descubrimientu personal qu'él fizo. Les enseñances nun son vistes polos siguidores como revelaciones divines nin como dogmes de fe, puestu qu'esiste una dinámica que puxa investigales ya interpretales. Considérase que s'algama'l so pescanciamientu pente medies de la meditación y la esperiencia.
L'únicu envís d'estes enseñances ye'l desaniciu dafechu de tou sentimientu d'insatisfacción o frustración. Sigún el budismu, la causa real de la insatisfacción ye o l'arrane ansiosu, o l'aferramientu, qu'a la so vez son el productu últimu d'ilusión ya ignorancia, entendíes como la perceición errónea de l'auténtica natura de la existencia. Poro, el paru dafechu d'esta situanza denómadr l'espertar. Pa guiar l'esfuerzu afayadizu p'algamar esi nueu estáu, el budismu desendolca y prescribe práutiques d'entrenamientu mental ya emocional, la disciplina ética y l'estudiu.
El budismu ye la cuarta relixón organizada del mundu pol so númberu de siguidores, la mayoría d'ellos n'Asia, con unos 380 millones (o unos 700 millones si s'incluyera a la heteroxénea relixón tradicional china). Toles tendencies del budismu d'anguaño se puen clasificar en dos grandes grupos, el Budismu del Sur (o Theravāda) y el Budismu del Este (o Mahāyāna). Una adopción de les práutiques del tantrismu hindú fadría xurdir lo que n'ocasiones s'afirma como una tercera corriente, nomada Budismu del Norte o Tántricu (Vajrayāna), si bien filosóficamente ésta s'inclúi dientro del Mahāyāna.Plantilla:Destacado
