Usagi Yojimbo

De Uiquipedia

Usagi Yojimbo (qu'en xaponés significa “coneyu guardaespaldes”) ye una serie de cómic creada pol dibuxante Stan Sakai.

[editar] Sinopsis

Orixinalmente, Usagi y otros personaxes de la serie diben a ser humanos n'histories feches sobre la vida del famosu guerreru Miyamoto Musashi. Sin embargo cuando Sakai taba distraídamente faciendo garabatos, dibuxó un coneyu coles oreyes ataes. Rápidamente Sakai amplió la so idea y foi dando vida a un universu de personaxes que diríen acompañando a la so nueva creación nes sos aventures pel Xapón feudal.

Les peripecies d'esti coneyu samurái tienen llugar nel Xapón al entamu de la dómina Edo (principios del sieglu XVII). L'héroe ye un ronin (samurái ensin señor), Miyamoto Usagi, que caleya pel país en shogyusha (pelegrinaxe guerreru), alquilando los sos servicios de guardaespaldes. El personaxe d'Usagi tuvo inspiráu en Miyamoto Musashi, y l'ambiente de les histories ta influenciáu poles películes del realizador Akira Kurosawa, asina como los personaxes d'historieta Groo the Wanderer and Lone Wolf and Cub.

Los llibros tán formaos por aventures curties, con una historia más llarga como trama de fondu. Les aventures tienen los sos pegoyos munches veces nel folklore y les tradiciones xaponeses, incluyendo n'ocasiones criatures mítiques locales. L'arquitectura, los vestíos, les armes y toa una riestra d'obxetos son dibuxaos respetando fondamente l'estilu de la dómina. Asina podemos atopar dellos elementos d'arte o d’artesanos xaponeses, como los cometes, sables, o la cacía. Asina Usagi recupera accidentalmente la posesión de la espada lexendaria Kusanagi nel cursu d’una de les sos más llargues aventures.

[editar] Publicaciones

Usagi fizo la so primera aparición na antoloxía Albedo Anthropomorphics, depués na serie del editor Fantagraphics Books « Critters », anantes de tener la so propia serie. Nos Estaos Uníos, la serie foi asoleyada por tres editoriales diferentes : Fantagraphics (volumen 1 ; 38 númberos más un especial de verano y cuatro especiales en color), Mirage Comics (volumen 2 ; 16 númberos), y Dark Horse Comics (a partir del volumen 3), con quien sigue publicándose anguañu. N'España vien asoleyándose cola editorial Planeta de Agostini.

Arriendes d’ello, Stan Sakai realizó una serie derivada llamada “Space Usagi” que retoma los personaxes de la serie orixinal tresportaos a un mundu futurista, pero asemeyáu en numberosos puntos al Xapón feudal.

Usagi tamién fizo delles apariciones nes aventures de Les Tortugues Ninja (nel cómic, los dibuxos animaos y los xuguetes), igualmente les tortugues tamién apaecieron nes aventures del coneyu. Un proyectu d'adaptación de “Space Usagi” en dibuxos animaos tuvo en marcha, pero'l fracasu de Bucky O'Hare and the Toad Wars fizo que s'abandonara.

[editar] Usagi n'Asturies

Invitáu pol Salón Internacional del Cómic que se celebra añalmente en Xixón, l'autor d'Usagi Yojimbo, Stan Sakai, tuvo presente na edición del añu 1999, participando nuna sesión de firmes y nuna charra col públicu que posteriormente sería recoyida na revista El Wendigo.