Doag
Aus Wikipedia
A Doag (deitsch: Teig) wird definiert ois a Màss, in de wos faschiene Komponentn einigmischt wern. De sànd meistns Mäih und ebbs flüssigs (meistns Wåssa oda Mülli, koa aba a Bia oda Wei' sei) Zucka und Soiz. Vo de letztan zwoa Zutatn duat ma je nochdem ma an siaß'n oda an deftign Doag hom wui moi de oane moi des anda mehra eine.
Unta åndam gibt's an Hepfadoag, an Måbdoag, an Brezndoag, an Strudldoag, an Blàdldoag und an Schmåndoag.
Beim Doag wead durch des Mischn oda Rüahn im Mäih mit'da Flüssigkeid a Kleba freigsetzd. (Je mehra ma an Doag rüahrt, desto bessa bappt'a. Müabe Sachan soidt ma deszweng nedt z'stark oda z'lang rüahn.) Duach irgand a Middl kemman Luftblosn in den Doag. Des ko zum Beispui sei: g'schlongs Eiweiß, Hepfa de gärt, Bachbuifa oda a Sauadoag. Beim Bacha vaändat dea Bapp vo dem Mäih sei Struktua, wead fest und hoidt de Luftblosn, de se in da Hitzn no ausdehna, fest und wead daduach lockana. Ma duat, je noch dem wos ma draus macha mecht, a no gean a Fett in Doag, Nüß oda Obst (drocknet oda frisch) daß'a saftiga oda siaßa wead.
As Doagal is nedt ebban a weng a kloa g'rodna Doag, a so nennt ma a G'misch aus Wassa, Mülli oda Rahm und a weng am Mäih, um a guade Soß' zum bindn.
