Heinrich Hoffmann
El Vikipedio
Heinrich HOFFMANN [hajnriĥ hofman] (naskiĝis la 13-an de junio, 1809 en Frankfurt am Main, mortis la 20-an de septembro 1894 samloke) estis germana kuracisto kaj verkisto.
Ĉar lia granda pasio, la verkado, ne certigus al li sekuran materian estontecon, li konforme al la deziro de sia patro studis medicinon en Heidelberg, Halle (Saale) kaj Parizo, kaj poste laboris en tiu ĉi fako. Samtempe li dediĉis sin al la verkado kaj eldonis ekz. kolekton de poeziaĵoj (Gedichte) en la jaro 1842.
Literaturan sukceson Heinrich Hoffmann gajnis tute hazarde: Serĉante kristnaskan donacon por sia 3-jara filo, li konstatis, ke ne haveblis belaj libroj por infanoj tiuaĝaj. Li do ekverkis mem kaj je Kristnasko 1844 la donaco estis preta. Al la eldonado oni tamen devis persvadi la aŭtoron: Probable timante pri sia reputacio kiel serioza kuracisto okupiĝanta pri tiaj infanaĵoj, li publikigis la verkon en 1845 sub la pseŭdonimo Reimerich Kinderlieb. La libro, temanta ekzemple pri knabo (la Struvelpetro aŭ Hirthara Petro) kiu ne volis kombi kaj tondi sian hararon, pri knabino ludanta kun fajro kaj pereanta en la flamoj kaj pri knabo rifuzanta la manĝadon kaj mortanta de subnutrado..., tuj famigis la aŭtoron.
En sia kuracista kariero Heinrich Hoffmann estis alte aprezata, ĉar li forte engaĝiĝis por pli humana vivo de psike malsanaj personoj. Li mortis en sia naskiĝurbo.
[redaktu] En Esperanto aperis
Hirthara Petro / El la germana lingvo de Rudolf Fischer. - [Neustadt a.d. Weinstraße]: Meininger, [1988]. - 48 p. : ĉefe ilustr.
ISBN 3-87524-077-4
Originalo: Struwwelpeter
La Struvelpetro : beletaj rakontoj kaj komikaj bildoj / de Heinrich Hoffmann. Esperanta trad. de J. D. Applebaum. - Frankfurt a. M.: Literatura Instituto Rütten kaj Loening, 1921. - 24 p. : multaj ilustr.
Originalo: Der Struwwelpeter
La Struvelpetro : beletaj rakontoj kaj komikaj bildoj / de Heinrich Hoffmann. Esperanta trad. de J. D. Applebaum. - Kopenhago: Eld. TK, [proks. 1971]. - 24 p. : multaj ilustr.
ISBN 87-87089-02-5
Originalo: Der Struwwelpeter
