Wright fratuli
From Wikipedia
Orville Wright 19 di agosto 1871 til 30 di januaro 1948 e sua frato Wilbur Wright 16 di aprilo 1867 til 30 di mayo 1912 esis pioniri en flugado per motorizita aeroplani. Orville flugis unesme per aeroplano ye 17 di decembro 1903.
La flugo-probeyo di le Wright esis en Kitty Hawks, Nord-Karolina che esta rivo di Usa. L’ unesma flugo startis alonge reli, pro ke l’ aeroplano havis nula rotuli o stipito, ma nur du plani e motoro. L’ unesma flugo duris 12 sekundi e 35 metri. Samadie Orville flugis duesmafoye: 59 sekundi e 860 metri, ma l’ aeroplano krulis en ventego divenante ne-flugebla.
Le Wright esis longe interesata pri flugado. Unesme li konstruktis kaiti, pose glitili. Li igis anke probi en vinto-tunelo pro lernar aerodinamiko. Li esis biciklo-fabrikisti, e lo explikas multa teknikala rezolvi en konstrukto dil unesma aeroplano fluginta. Kom exemplo por la aeroplano li ne havis la konstrukto di ucelo, quale altra konstuktisti havis.
La Wright-fratuli konstruktis fluganta vehilo, ma ye 1908 Orville tervenis krulante, kande li introduktis la vehilo a reprezentanti di Usan armeo. Pasajero lietnanto Thomas Selfridge mortis e Orville mustis esar en hospitalo sep semani.
Le Wright volis posedar omna patento-yuri dil aeroplano. Pro to la developo dil aeroplano kelke tardeskis. Ma frato Wilbur mortis ye 1912 e la developo dil aeroplano divenis omnaloke en mondo tala intensa dum unesma mondo-milito, ke Orville ne plue povis o volis surveyar patentala yuri.
