Íslendingabók Ara fróða
Úr Wikipediu, frjálsa alfræðiritinu
- „Íslendingabók Ara fróða“ getur einnig átt við ættfræðigrunninn Íslendingabók.
Íslendingabók var rituð af Ara fróða Þorgilssyni einhvern tíma á árunum 1122-1133. Hún er elst íslenskra sagnarita, stutt yfirlitsrit um sögu Íslands frá landnámi og að ritunartíma. Íslendingabók var skrifuð á íslensku, þrátt fyrir að alþjóðamál lærðra manna á ritunartímanum hafi verið latína. Segja má að Ari hafi þannig í upphafi íslenskrar bókmenningar markað þá stefnu að rita á móðurmálinu. Stíll Ara er knappur og ber þess nokkur merki að Ari er latínulærður. Heimildarmenn eru valdir af kostgæfni og nefndir, elsti heimildarmaður Ara var fæddur árið 995. Í Íslendingabók er meðal annars sagt frá dvöl papa á Íslandi, landnámi Íslands, stofnun Alþingis, kristnitökunni, fundi Grænlands og upphafi byggðar þar, auk þess sem tímatalið er skorðað.
Elsta varðveitta handrit Íslendingabókar er frá 17. öld, pappírshandrit skrifað af Jóni Erlendssyni, presti í Villingaholti fyrir Brynjólf Sveinsson Skálholtsbiskup. Jón skrifaði Íslendingabók upp eftir gömlu handriti, sem nú er glatað, en talið er að hafi verið frá því um 1200. Handritið mun hafa týnst skömmu eftir að Jón skrifaði það upp, en Árni Magnússon fann ekkert af því þegar hann safnaði íslenskum handritum nokkrum áratugum síðar.
[breyta] Heimildir
- Íslendingabók frá «Kulturformidlingen Norrøne Tekster og Kvad» í Noregi.
- Íslendingabók á dönsku frá «Kulturformidlingen Norrøne Tekster og Kvad» í Noregi.
- Íslendingabók - Stofnun Árna Magnússonar
- Ari fróði og Íslendingabók - Netla
