გაბარაშვილი, თამარ
ვიკიპედიიდან
თამარ ბორისის ასული გაბარაშვილი (* 22 ივლისი, 1937, თბილისი), ქართველი ვიოლონჩელისტი. საქართველოს სახალხო არტისტი (1981).
1954-1956 წლებში სწავლობდა ვ. სარაჯიშვილის სახელობის სახელმწიფო კონსერვატორიაში ჩელოს სპეციალობაზე ( ა. ჩიჯავაძის კლასი). 1962 დაამთავრა მოსკოვის კონსერვატორია (ჩელოს კლასი, პედაგოგი პროფესორი ს. კოზოლუპოვი), 1966 - ასპირანტურა (იქვე, პროფესორ მ. როსტროპოვიჩის კლასი). 1966-იდან "მოსკონცერტის" სოლისტია, 1986-იდან - თბილისის კონსერვატორიის პედაგოგი, 1987-იდან - სიმებიან საკრავთა კათედრის გამგე. მისი საშემსრულებლო ხელოვნებისათვის დამახასიათებელია მაღალი პროფესიონალიზმი, ემოციურობა, მუსიკალობა. რეპერტუარში აქვს ი. ს. ბახის, ლ. ბეთჰოვენის, ფ. ი. ჰაიდნის, ლ. ბოკერინის, ბ. ბრიტენის, დ. შოსტაკოვიჩის, ს. პროკოფიევის, ა. შნიტკეს, ს. ცინცაძის, ს. ნასიძის ნაწარმოებები. მუსიკოს-შემსრულებელთა არაერთი საერთაშორისო ფესტივალისა (1962, ჰელსინკი, ოქროს მედალი) და კონკურსის (პაბლო კაზალსის სახელობის კონკურსი, ბუდაპეშტი, 1963, III პრემია; ჩაიკოვსკის სახელობის კონკურსი, მოსკოვი, 1966, IV პრემია) ლაურეატი, კონცერტებს მართავს ყოფილ სსრკ-ისა და საზღვარგარეთის სხვა ქვეყნებში (აშშ, კანადა, ფინეთი, ჩეხეთი, სლოვაკეთი, უნგრეთი და სხვა). საქართველოს სახელმწიფო პრემია (1995).
