Iohannes Sebastianus Bach
E Vicipaedia
Iohannes Sebastianus Bach (Theodisce: Johann Sebastian Bach; natus Ysenaci 21 Martii 1685; obiit Lipsiae 28 Iulii 1750) erat compositor Theodiscus organistaque praeclarus aetate Baroca.
Bach erat excellentissimus musicae creator: consummavit ac perfecit traditiones praecurrentes musicamque aetatum posteriorum usque ad dies nostros permanenter inspirat.
Vitae suae circulus localis tam restrictus erat quam spiritus sui circulus scientiae universalis. Neque Italiam visitavit neque Franciam. Civitates principesque quorum musicae fuit director in media Germania tantum inveniuntur. Tamen in operibus suis totius Europae modos musicales sibi assimilavisse et in altum duxisse videtur.
Post nonnullas stationes praevalente Coethen sustinuit dignitatem et obligationes cantoris ecclesiastici Lipsiensis usque ad finem vitae suae.
Bachi radix spiritualis christianismus erat confessionis Lutheranae cui toto corde adhaerebat. Magna operum suorum copia pro cultu divino facta est. In oratoriis et cantatis, tam verba biblica quam cantiones ecclesiae lutheranae nec non poeses contemplativas ad gustum contemporaneum profunde interpretatus est, quam ob causam saepe praedicatorem esse dicitur musicalem. Eminent etiam compositiones in lingua latina sicut Missa Magnificatque, sed et musicae saecularis genera omnia ei familiaria erant excepta opera quae appellatur. Musicam vero omnem, et sacram et saecularem, Bach insigne Dei donum ac mentis eius in terra imaginem esse credebat, quod opera sua subscribendo "Soli Deo Gloria" vel "S.D.G." expressit.
In Concertis Brandenburgensibus, Passione Domini Nostri Iesu Christi Secundum Matthaeum, Missa Solemni toni Si minoris, et Arte Fugae ultima et optima paene ad genera singularia musicae occidentalis contributa confecit.
[recensere] Vide etiam
 |
Haec stipula ad biographiam spectat. Amplifica si possis. |
