Bristol

Vu Wikipedia, der fräier Enzyklopedie.

Dëse Geographiesartikel zu Groussbritannien an Irland ass eréischt just eng Skizz. Wann der méi iwwer dëst Thema wësst, sidd der häerzlech invitéiert aus dëse puer Sätz e richtegen Artikel ze schreiwen. Wann dir Hëllef braucht beim Schreiwen, da luusst bis an d'FAQ eran.

Bristol
	\|
Land	Groussbritannien
Landesdeel:	England
Koordinaten:	51°27'N, 2°35W
Fläch:	110 km²
Awunner:	380.615 (2001)
Bevëlkerungsdicht:	3.429 / km²

Bristol ass eng Stad a Grofschaft (Unitary Authority) am Südweste vu Groussbritannien an e wichtege regionale Wirtschafts-, Kultur- an Educatiounszentrum.

[Änneren] Geographie

Bristol läit am Südweste vun England um Zesummefloss vun de Flëss Avon a Frome, eng 200 km westlech vu London. Mat enger gudder halwer Millioun Awunner déi an der Agglomeratioun liewen as Bristol di sechst gréisst Stad an England, an di nengt gréisst a Groussbritannien.

Bristol as eng onofhängeg Grofschaft ("unitary authority") a grenzt am Norden an Osten un d'Grofschaft Süd Gloucestershire, an am Süden un d'Grofschaften Nord Somerset a Bath an Nordost Somerset. Am Weste grenzt d'Stad un de Bristol Channel, en Deel vum Iresche Mier.

[Änneren] Geschicht

Wärend der Réimescher Epoch gouf et eng Siidlung mam Numm Abona op dem Gebitt vun der haiteger Stad, déi per Réimerstrooss u Bath ugebonne war. Am Mëttelalter huet Brycgstow (al Englesch: "d'Plaz bei der Breck") sech zu engem nennenswäerten Hafen entwéckelt, nodeems d'Bett vum Floss Avon am Stadzentrum vergréissert gouf. Doduercher konnt sech eng ganz aktiv Schëffsbau- and Handelsszeen entwéckelen. Zäitweileg ass praktesch de ganzen Handel vu Groussbritanien mat Irland iwwer Bristol oofgewéckelt ginn, a Bristol war an der Mëtt vum 14. Joerhonnert déi drëttgréisste Stad an England (no London a York). Am 15.a 16. Joerhonnert ass et du méi lues gaangen, a wärend der Englescher Revolutioun ëm 1640 huet d'Stad staark gelidden.

Den Hafen, an domadder d'Stad, hunn am 17. an 18. Joerhonnert dunn awer erëm rapid u Bedeitung gewonn, virun allem duerch den Handel mat de Britesche Kolonien an Nordamerika an Afrika. Bristol gouf domadder och, zesumme mat Liverpool, zu engem Zentrum vum Sklavenhandel. Et gëtt geschat dass ronn eng hallef Millioun Sklaven op Schëffer, déi zu Bristol produzéiert goufe, vun Afrika an Nordamerika transportéiert goufen. Mat der Zäit goufen et awer erëm Probleemer, virun allem duerch de Krich mat Frankräich 1793, deen de maritimen Handel staark matgeholl huet, an duerch d'Ofschafe vun der Sklaverei 1807. Allerdéngs konnt Bristol seng wichteg Stellung weider verdeedegen.

Am Joer 1841 ass d'Eisebunnslinn Great Western Railway, déi London mat Bristol a spéiderhi mat Südwales verbënnt, opgaangen, wouduercher den Hafe sech London als potentielle Maart geséchert huet. De Great Western Railway war virun allem eng Leeschtung vum Isembard Kingdom Brunel, engem jonke Bauingenieur, dee spéiderhin och d'Bristol Suspension Bridge, eng vun den Attraktioune vum haitege Bristol, entworf huet.

Am Zweete Weltkrich ass e groussen Deel vu Bristol, virun allem am Zentrum, zerstéiert ginn. Nom Krich goufen dunn an deenen zerstéierte Staddeeler Bëtongstierm, Akafszentren an Duerchgangsstroosse gebaut, an et huet bis an d'1980er Joere gedauert, bis endlech erem Wäert och op d'Schéinheet an d'Liewensqualitéit am Stadzentrum geluecht gouf. Am Ufank vum 21. Joerhonnert féiert d'Stad e grousse Renovatiounsprogramm duerch, fir d'Bild vum Stadzentrum ze verschéineren.

Bristol war Kandidat fir d'Europäesch Kulturstad 2008, en Titel dee schlussendlech awer u Liverpool goung.

[Änneren] Politik

Well d'Stad Bristol eng Unitary Authority ass, ass de Gemengerot (local council) och gläichzäiteg de Rot vun der Grofschaft (County Council). De Rot besteet aus 70 Deputéierten (councillors), déi 35 Walkreeser (wards) representéiren. Vun deenen 3 grousse Parteien an England huet keng eng absolut Majoritéit, mee am Moment (läscht Deelwalen am Mee 2006) gëtt de Rot vun der Liberaldemokratescher Partei gefouert, déi 33 Deputéierte stellt. Labour huet 23 Deputéiert, an déi Konservativ sinn 13 mol representéiert. Buergermeeschtesch (Council Leader) ass d'Barbara Janke vun de Liberaldemokraten, an déi zeremoniell a representativ Aufgabe gi vum Lord Mayor Peter J Abraham iwwerholl. Gewielt gëtt all 1 oder 2 Joer an Deelwalen, an all Deputéierte behällt säi Sëtz fier 4 Joer.

Op nationalem Plang ass Bristol duerch 5 Deputéierten am House of Commons representéiert. D'Walkreeser si Bristol West, Ost, Süd an Nordwest, a Kingswood, déi awer deelweis iwwert d'Limite vun der Stad erausginn. An de Wale vun 2005 goufe 4 Deputéierte vu Labour an ee vun de Liberaldemokraten (zu Bristol West) an d'Parlament gewielt. Fier déi next Walen op nationalem Plang ass allerdengs geplangt fier d'Limitte vun de Walkreeser ze änneren.

[Änneren] Kultur, Edukatioun, Sport

Bristol huet zwou Universitéiten. D'University of the West of England huet ronn 20.000 Studenten, an op der University of Bristol studéire knapps 13.000 Leit.

Zu Bristol gëtt et 2 professionnel Foussballsveräiner: Bristol City spillt an der englescher League One, der drëtthéchster Spillklass am englesche Foussball, a Bristol Rovers ass aktiv an der League Two, der véierthéchster Spillklass. Wichtegste Sport ass awer Rugby an deem de lokale Veräin ee vun deene beschten am Land ass.