Karl Theodor Robert Luther
Vu Wikipedia, der fräier Enzyklopedie.
De Karl Theodor Robert Luther ass gebuer de 16. Abrëll 1822 zu Schweidnitz/ Schlesien ass gestuerwen de 15. Februar 1900 zu Düsseldorf. Hie war en däitschen Astronom, dee virun allem duerch d’Entdeckung vu sëllechen Asteroiden bekannt gouf..
Zënter 1841 studéiert hien zu Breslau an zu Berlin Philosophie, Mathematik an Astronomie. Gläichzäiteg schafft hien am Berliner Observatoire a kritt do 1848 eng Ustellung. Am Joer 1851 wiesselt hie als Direktor an den Observatoire vun Düsseldorf.
Tëschent 1852 a 1873 geléngt him do d’Entdeckung vu 24 Asteroiden. Domat hat hien den däitsch-franséischen Astronom Hermann Mayer Salomon Goldschmidt "iwwerholl", deen 1852-1861 14 Asteroiden fonnt hat. Nom Luther huet den Amerikaner C.H.F. Peters et op 48 Entdeckungen (1861-1889) an den Éisträicher Johann Palisa et op 123 Asteroiden bruecht (1874-1923).
Beim Zeechnen vun der akademescher Stärekaart hora O entdeckt de Luther de verännerlechen Stär T Piscium am Stärebild Pisces (Fësch).
An der Universitéit Bonn gouf hien 1855 zum Dr. phil. honoris causa ernannt a krut vun der Paräisser Académie des sciences 7mol de Lalandesche Präis fir Astronomie. Seng Stad Düsseldorf huet sech fir de Prestigegewënn finanziell erkenntlech gewisen.
Op der Paräisser Gedenkmedaille vum Joer 1868, déi ulässlech vum honnertsten Asteroid geprägt gouf, ass hie niewent dem Hermann Goldschmidt an dem John Russell Hind, zwee aner Rekordentdecker, ofgedréckt.
No him gouf och den Asteroid (1303) Luther genannt.
