Radio Dreyeckland
Us der alemannische Wikipedia, der freie Dialäkt-Enzyklopedy
'S links-alternativi Radioprojekt Radio Dreyeckland (RDL) wo in de 1970er-Johr als Radio Verte Fessenheim gründet worde isch, isch eins vo de erschte Freien Radios z'Dütschland.
Entschtande isch RDL us de Anti-AKW-Bewegig, insbsundri us de Protescht um 's planti Atomkraftwerk z' Wyhl am Kaiserstuhl. In de erschte Johr vo sinere Exischtenz het RDL als Piratesänder vo me mobile Sendewage us g'sändet, sit de 1980er Johr sändets legal uf de Frequenz 102,3 MHz us sinem Freiburger Schtudio im sälberverwaltete Grethergländ. Mit em Begriff Dreyeckland isch es Dreiländereck Dütschland - Frankrich - Schwyz gmeint wo vo RDL als Izugsgebiet agseh wird. Zuesätzlich zuer Friburger Frequenz 102,3 MHz deile sich RDL un d' Radio Kanal Ratte (RKR) d' Frequenz 104,5 MHz vom Sänderschtandort Hochi Möhr (500 W) im Wiesedal. RDL sändet dört vo 3 bis 15 Uhr si Wiederholigs- un Nachtprogramm, vo 15 bis 3 Uhr hört me dört 12 Schtund Live-Programm us Schopfe vom Kanal Ratte.
'S Programm vo RDL wird witschtens durch Grupperadio bschtimmt, d.h. einzelni Gruppe produziere Sändige, di uf regelmäßige Sändeplätz usgschtrahlt wärde -- so gits e Fraue- un Lesberadio, e Schwule Welle, de anarchistische Schwarzen Kanal, de Knastfunk un d' Umweltsendig Global 3000. Drnäbe gits Inforadio, meh odr weniger alternativi Musiksendige un muetterschprochlichi Sendige in Russisch, Portugiesisch un Persisch.
Mit ähnliche Projekt wie s'Radio Z Nürnberg, em Querfunk Karlsrueh, em Radio Kanal Ratte [1] us Schopfe etc. duscht RDL Sendige us. RDL isch im Verbund mit de andere baden-württebergische Freie Radios in de Assoziation Freier Gesellschaftsfunk (AFF) organisiert.
[ändere] Weblinks
- Homepage vo Radio Dreyeckland
- Assoziation Freier Gesellschaftsfunk (AFF), Baden-Württemberg
