Weinfelden

Us der alemannische Wikipedia, der freie Dialäkt-Enzyklopedy

Wiifälde (dt. Weinfelden) isch e politischi Gmeind und de Hauptort vom gliichnamige Bezirk im Kanton Thurgau im Oschte vo de Schwiiz.

[ändere] Allgemains

Wiifälde liit i de Nöchi vo de Thurgauer Hauptstadt Frauefäld, aso mitem Auto hät me öppe 20 Minute, mitem Schnellzug 10 Minute. Mehreri kantonali Iirichtige händ wäge de zentralere geographische Lag z Wiifälde iren Sitz, so zum Biischpil d Thurgauer Kantonalbank und s Thurgauer Vowaltigsbüro. De Grooss Rot vom Thurgau vobringt de Winter z Wiifälde.

[ändere] Schuel und Chile

D Bildigsstätt umfassäd für di obligatorischi Schuelziit Chindergärte, Primar- und Oberstufeschuel. Dänäbed isch Wiifälde Schuelort vom gröschte Bruefsbildigszentrum vom Kanton Thurgau; Mittel- und Hochschuele sind i Pendlerdistanz erreichbar. Nöd vogässe dörf me au nöd s Chinderhuus Wiifälde, und d Jugendmusigschuel.

Wiifälde hät e evangelischi und e katholischi Chilegmeind; die evangelisch-reformiert Chile isch im Jugendstil 1902-19904 baue worde und hät inne draa e Jugendstil-Uusstattig wo zimli beiidruckt.

[ändere] Kultur und Sport

Sit 1998 gits au es Kino mit drei Liinwänd und im ganze 450 Sitzplätz. Gad näbed em Kino isch de Uusgangskomplex Firehouse, was äbefalls no vili Jugendlichi aalockt am Wuchenänd isch s La Luna.

Für die wo wönd Sport mache häts ussert emene Halle- und Freibad mehreri Sporthalle mit Usseplätz, e Tenishalle und en Tenisusseplatz, so wie e Iisbahn und e Curlinghalle. All da findet me i de Gütti. Sit em Joor 2006 stoot z Wiifälde di erscht Norm Inline-Skating Rundbahn vo Europa.

Im Herbscht findet jewiils d Thurgauer Gwerbeuusstellig WEGA statt, die lockt jedes Joor so öppe 100'000 Bsuecher aa; im Früelig isch d Gastronomimäss Schlaraffia und d Schwiizer Chilemäss Swisseglise.