Bal d'Ezcua
De Biquipedia
La Bal d'Ezcua (en euskera Aezkoa Ibarra) ye una bal nabarra, situata en los Perinés en la redolada d'Auñamendi. Muga á lo norte con la Tierra de Zisa (Baxa Nabarra), á l'este con la Bal de Sarasaz, á lo sur con Urraul Alto e á l'ueste con la Balle d'Arze, Burguet e Ronzesbals.
D'orografía montañosa, pero no tanto como en lo Perineu zentral. Grans selbas de caxicos e fayos dan á lo paisache ezcuano una particular belleza, que complementan las auguas de lo río Irati, prenzipal corrient flubial de la zona. L'ibierno propizia en Ezkua grans nebatas, mientres que los beranos son suabes e agradables.
La bal ye integrada por nueu monezipios: Abaurrea Alta, Abaurrea Baja, Aria, Arive, Garayoa, Garralda, Villanueva d'Ezcua, Orbara y Orbaiceta. Las localidaz son chicotas, formatas por tipicas casas perinencas con paretes de piedra encaladas e tellatos con muita pendient. La ganadería ha perdito la balura d'antismás, cuan interminables rabaños de obellas pasaban las cañatas dica la Ribera Nabarra enantes que plegase l'[ibierno]], los ezcuans conserban con zelo las artes tradizionals de la elaborazión d'un formache con una fama que trasziende las mugas de la Comunidat.
Lo basco ye representato por lo charrar local aezkera, y encara lo charra la chenerazión gran (en los años 1950 y 1960, se cheneralizó l'emplego de lo castellán en lo mesmo prozeso castellanizador que en l'Alto Aragón).
