Johan Ferrández d'Heredia
De Biquipedia
Johan Ferrández d'Heredia (Munebrega (Z.), 1310 - †Abiñón, 1396) estió un relichioso aragonés d'o sieglo XIV, miembro d'a Orden Militar d'o Espital de San Chuan de Cherusalén, y dentro d'ella estió Castellán d'Amposta dende 1346, y Gran Mayestre u Mayestre de Rodas -cargo més gran- dende 1377. Estió o promotor de numerosas traduzions y complilazions d'obras istoricas en aragonés, y consellero d'os reis d'Aragón.
No se sabe guaire d'a nineza, pero en 1328 ya yera caballero d'a orden d'o Espital. A escape puyó en a Orden, como comandador de Billel, Aliaga y Alfambra. En 1348 refirmó a politica de Pero lo Zerimonioso d'oposizión á la Unión Aragonesa, que remató en a Batalla d'Epila. Dimpués colaboró con o rei d'Aragón en afers diplomaticos, y marchó ta la isla de Rodas pa cusirar a luita contra os turcos en Grezia, en do fue preso cautibo por más d'una añada. Dende 1382 dica la muerte residió en Abiñón, siede d'o Papa aragonés Pedro Martínez de Luna, Benedito XIII.
Allá por 1350 encomenzoron as inquietuz literarias de Johan Ferrández d'Heredia. Estió un intelectual reconoxito dentro e fuera d'a Corona d'Aragón, y a suya biblioteca yera deseyata por umanistas como Salutati; belunos lo consideran uno d'os primers umanistas, pero a suya mentalidat encara yera de tot mediebal, encara que a faina de recuperazión d'obras clasicas fuese pionera en toda Europa.
L'aragonés d'as suyas obras ye poco uniforme: i ha obras muito castellanizadas, n'i ha atras en un aragonés muito puro, y también una ripa de catalanismos, italianismos, elenismos, etz. Ixa dibersidat s'atribuye por un regular ta os copistas no aragoneses que eban de fer as obras en ista lengua, t'a inecsistenzia d'una luenga capaz enta par d'alabez, y ta os prozesos de traduzión dende luengas como o castellán, o catalán, o francés, l'italiano y o grieco clasico y bizantino. Con tot, os contemporanios y él mismo siempre la identificoron como "lengua aragonesa" u "aragonés".
[editar] Traduczions empentadas por Johan Ferrández d'Heredia:
- Libro de los Emperadores.
- Libro de los fechos et conquista del principado de Morea.
- Flor de las Ystorias de Orient.
- Libro de Marco Polo.
- Libro de Actoridades o Rams de Flores.
- Discursos d'a Istoria d'a Guerra d'o Peloponeso.
- Secreto Secretorum.
- Ystorias de Orosio.
- Bidas Paralelas de Plutarco.
- Historia Romana de Paulo Diácono.
[editar] Compilazions istoricas empentadas por Johan Ferrández d'Heredia
- Grant Cronica d'Espanya.
- Cronica de los Conquiridors.
