Cheamsee

Aus Wikipedia

Der Àrtikl is im Dialekt „Obaboarisch“ gschriem worn.

Cheamsee "S'boarische Meer"
Åigemeines
Geografische Låg: Oipmvorland Zuaflüss: Tirola Achn, Prea Åflüss: Alz = Oiz Gressane Stéd am Uafa: Prean am Cheamsee, Seebruck, Cheaming Gressane Stéd in da Géngd: Traunstoa
Dàtn
Hechn üwa'n Meeresspiagü	518,19 m ü. NN
Flächn	79,9 km²
Volumen	2,04784 km³
gresste Diafn	72,7 m (Stand: Mai 2005) "Unschuidige- Kinda-Gruam"
durchschnittliche Diafn	25,6 m
Bsondaheitn	zwoatgressta innadeitscha See

An Cheamsee (hochdeitsch:Chiemsee) hoaßd ma’r àà as „boarische Meer”. Er ligd so um de 25 Kilometa estlich fo Rosenheim, oiso im Sidosten fo Obabayern. Er is da gräßde See in Bayern, und àà in ganz Deitschland hàn grod da Bodensee und da Müritz-See no grässa. Es is aba’r aso, dàss faglicha mim Cheamsee da Starnberger See des mehra Wossa hod, wei dea fui tiafa is. Da Cheamsee is am End fo da letztn Eiszeit entschdandn, des war for eppa 10000 Johr. A Gletscha hod des Beckn fo dem See ausgschom. Ganz am Ofang war da See um de 240 Quadratkilometa grouß, oiso ebba dreimoi so grouß wia’r a heint is.

Da Cheamsee hod an Rauminhoit fo 2.047.840.000 Kubikmeta. Sei Ufer is 63,96 Kilometa lang, und boi ma de Insln àà mit dazuarechnad hàns 83 Kilometa. As Einzugsgebiet is 1.398,56 Quadratkilometa groaß.

An da tiafstn Schdej is da Cheamsee 72,7 Meta tiaf (gmessn im Mai 2005). Aba dees und àà de durchschnittliche Tiafn wean oi Johr a kloans bissl wenga – zwengs dera Zuafuhr fo Sand und Gröll, fo dea weida unt d’Red sei wead. Do dazua kimmt no dees, wos ma „Verlandung“ hoaßd, dees bedeit, dàss da See vom Rand hea schee schdààd zuawachst. De letztn 100 Johr hod auf de Weis de Wossaflächn so um de 200 Hektar abgnumma. For 100 Johr is da Wossaschbiagl um guad oan Meta obgsekt worn, durch dees hodma woiddan fui Land gwonna.

Dea Nama fom See gehd zruck af an Adlign im Mittelalter, dea wo Chiemo ghoaßn hod. Und do dafo kemman àà de Nama fo da Gmoa Cheaming und fom ganzn Cheamgau. Dees „Ch“ in dene Nama is àà friahas scho oiwei wia’r a „K“ ausgschbrocha worn. Und deszweng is àà heid no de Ausschbroch [Keamsee] oda diam àà hochdeitsch [Kiemsee] – aba af koan Foi [Schimsee] oda [Chimsee], wia de Norddeitschn oftmois moanan, und wia mas leida teilweis im Radio oda im Fernseng hean ko!

Inhaltsverzeichnis 1 Zua- und Abfluss 2 De Inseln 3 Schaug àà unta 4 Literatur 5 Weblinks 6 Quejn

[dro werkln] Zua- und Abfluss

Obgseng fo a bor kleanane Bàchal hod da See zwoa Zuafliss: De Tiroler Achen und de Prien [Prea]. Oi zwoa kemmans ausm Sidn, aus de Berg – de Tiroler Achen ausm Achentoi und de Prien ausm Sachranger Toi. Und oi zwoa schwoabns Johr fia Johr an Haufa Sand und Gröll in’n See eini, und zwengs dem wead dea oiwei kleana und flacha. De Tiroler Achen hod auf de Weis im Sidosten fom See a richtgs kloans Delta in’n See eini aufgschitt, a fakloanade Ausgob fom Mississippidelta. Dees is heint a scheens Naturschutzgebiet, wo hauptsächli Wassafegl eanane Bruad- und Rastplätz hamm. De Prien fliaßd af da Westseitn in’n See eini, und zwar in de Schafwaschener Bucht im Norden fom Ort Prien, dea wo sein Nama fo dem kloana Fluss hod.

Da oanzige Abfluss is de Alz, de wo am nerdlichstn End vom See, in Seebruck, aussakimmt. D’Alz fliaßd nach Norden und Nordosten. Sie is a Nebnfluss vom Inn, den wos a Schdickl obahoib fo Marktl erreichd.

[dro werkln] De Inseln

Da Cheamsee hod drei Inseln. Da Gräß noch hàn dees: De Herrninsl (da offizielle Nama is Herrenchiemsee) mid 238 ha, de Frauninsl (Frauenwörth, "Frauenchiemsee") mid 15,5 ha und de Krautinsel mid 3,5 ha. De ligd zwischn dene andan zwoa Insln.

A Schduckara drei kleanane Sandbänk, de wo ma bei normaln Wossaschtand ned siegt, ko ma kàm Inseln hoaßn. De gräßte dafo is no da Schalch zwischen da Fraun- und da Krautinsl, wo diam amoi a kloane Weidn drauf gwachsn is.

De drei groußn Inseln hàn midnand de Gmoa Cheamsee, de ghead zun Landkreis Rosenheim. Zu dem Landkreis ghean àà de Gmeindn am Westufer fom See: Bernau, Prean, Rimsting, Breitbrunn und Gstadt. Oiss andane, de ganze Wossaflächn und de Gmeindn im Nordn, Sidn und Ostn, ghean zum Landkreis Traunstoa.

[dro werkln] Schaug àà unta

• Listn vo de Seen in Deitschland
• Cheamsee-Bahn
• Cheamsee Reggae Summer

[dro werkln] Literatur

• Michael Lohmann: Chiemsee-Naturführer. Landesbund für Vogelschutz, Prien ²1988.

[dro werkln] Weblinks

• Seitn vom Wåssawirdschåftsåmt zur Valåndung vom Chiemsee
• Livebuidln vo vaschiedene Ståndorte am Chiemsee
• Chiemsee - Reiseinformation bei Wikivoyage
• Ringkanal

[dro werkln] Quejn

• http://www.weblexikon.de/Chiemsee.html

Koordinaten: 47° 89' N, 12° 47' E