Diskussion:Cheamsee

Aus Wikipedia

I find einfach ned raus wia ma so a Vorlag bastelt, hob ma des ganze dann a moi vo da Originalseiten obakopiart, aba geh duadts trotzdem ned. Wenn se oana finden dat, der´s macht, a sakrisch danksche und wennst nachad no so nett warst, zum schreibm wia des gäht, oder mia mim Zaunpfahl winkst und zoagst wo i des nochlesen ko, dann bin ich happy ;-) Gruss DaDeus

I håb da's amåi gmåchd ... a bassads Büidl miaßad ma håid nu findn! Schene Griaß --Maxx82 20:06, 23. Jul. 2007 (CEST)

Servus, i hob grod den Artikl glesn und er liest se echt guat. A Kloanigkeit kannt ma ollerdings bei da Sproch verbessern. Oamoi steht Joahr und a wengerl spaada Jahr. Da daat i ibaoi "Joar" oda "Joor" schreibm. Statt "größer's" daat i z.B. gressers, heutig'n => heitign, spülen => spuin, zerst => zerscht schreibm. Oamoi san de Werta ohne Stricherl "gnennt", "zerst" und a ondermoi mit Stricherl "letzt'n", "heutig'n". Da kannt ma's no a bisserl vereinheitlichn. Pfiat Gott, --Roland 22:23, 23. Jul. 2007 (CEST)

A Fråg: is Chiemsee néd Hochdeitsch? Oda sågt ma glei in a påår Regjonen Cheamsee? Schene Griass--Mucalexx 23:43, 25. Jul. 2007 (CEST)

Du host scho Recht, Chiemsee [Kimsee] is hochdeitsch. (In dem Artikl san ja no mehrer Werta hochdeitsch.) Trotzdem is des gsprochane [K] bei Chiemsee oda Cheamsee gonz wichtig. I hob scho Leit aus Nord- oda Mittldeitschland gheart de Schimsee, Schina, Schemii oda Hiimsee, Hina, Hemii gsogt hom. --Roland 01:54, 7. Aug. 2007 (CEST)

A Spezl von mir hot aussagfundn, daß da aktuelle Artikl a Ibersetzung von http://www.weblexikon.de/Chiemsee.html is. Da Wortlaut und Satzbau is praktisch ibernommen und a bisserl ibersetzt worn. Um des ebbas scheena z'macha hot da Gunther (aus Oawin) den Text umgschribm und i versuach's ietz eiz'baun. --Roland 23:10, 16. Okt. 2007 (CEST)

Dea Spezl fom Roland, dea bin i. De letztn zwoa kloanan Änderunga de hobi ohne Omejdung gmachd. Aber etzad hobimi ogmejd. Und i mehad scho gern den Àrtikl weidaschreim - schaungma'r amoi, ko leichd sei, dàss's a wengal dauert! --Gunther

I bin mit dera Änderung "Chiemsee" nach "Cheamsee" iwahaupts ned einfaschdandn! Amend kon mia oana song, wo ma dees àso sagd? Und außadem bin i da Meinung, dàss ma Nama àso lossn soitad, wias offiziell gschriem wean! Dea "Chiemo" schdehd oiwei àgràtt àso in de Urkundn - und iwahaupts woaß heidzutog koa Mensch mehr, wia ma dees dortmois ausgschprocha hod! -[Gunther]

Des konn i dir scho song, wo ma des a so sagt, am Cheamsee ! Des woaß i gwiss, i kimm da her .... --Lou.gruber 11:39, 27. Jan. 2008 (CET)

Ja guad, dees glààb i ja gean! I wui da do àà gor ned dreiredn. Aba: 1. Wos is mid meim andan Einwand: Offizielle Nama fo geografische usw. Sachan? 2. I sejm bin Rosenheimer, hob (àà am Land) "Cheamsee" no niad ned ghead. Und de Riederinger Bauan (entan Ii - oiso Chiemgauer!) wo i kenn, de song àà imma grod Kimsee. Aba no amoi: Wannsd as du fia bessa hoitst, na lossmas àso! -Gunther

De Aussproch Kimsee und Keamsee is regional obhängig und koane von de zwoa Variantn is foisch. Es is hoit bschlossn worn, daß ma am Dialekt von am Artikl nur im Notfoi umanondbessern soit. I hätt aa scho gern efter amoi ebbas ausbessert wia z.B. "füa" => fia/fir in am mingara Artikl, obar do hot's ollawei ghoaßn, daß des hoit da münchner Dialekt von dem Autoren is und aso bleibm soit. Do konn ma se driber streitn ob des so sei muaß und guat is. Beim Ausbessern besteht auf jedn Foi de Gefahr, daß da Dialekt im Text nimmer so zammabasst. Der "Hauptautor" woaß nacha aa nimmer ob des ausbesserte stimmt ... Wann da Hauptautor wexelt, na waars net so tragisch wenn da Dialekt umgschribm werd. Wenn er net wexelt soit ma an Dialekt aso lassn wiara is. Ma konn ja dazuaschreibm, daß ma am Kimsee "Keamsee" sogt...

Interessant is a de Aussproch "groaß". I kenn "groaß", "roat" ... aus'm Sidboarischn und im westlichn Oberbaiern. Estlich von Minga is "grouß", "rout"... des iblichere. Offenbar is beim Kimsee/Keamsee net aso? --Roland 01:23, 28. Jan. 2008 (CET)

I kenn wia scho gsogt Keamsee und Kimsee. Des "ie" bei "Chiemo" oder "Chiemsee" kannt wirkli de oide Schreibweis sei. Na daats eher fir an Zwielaut sprecha wia fir a longes "ii" odar "i". --Roland 23:36, 28. Jan. 2008 (CET)

An den Lou.gruber: Und wiaso schreibdma na ned Keamsee? Wo doch des "ch" ned àso gschbrocha wead wia'r in hochdeitsch "manCHmal"??? -- Gunther

I hob iwaroin, wo "offizielle Bezeichnung" daforschdähd, "Cheamsee" gega "Chiemsee" tauscht! Weil "offiziell" is "Cheam-" gwieß ned! Gradàso hobi den "Cheamo" wieda zun "Chiemo" gmachd - weil genauàso hod dea ghoaßn, und ned anderschd! -- Gunther

I find de Schreibweis mit "ie" aa guat. De losst ja aa de Aussproch Kiamsee, Keamsee oder Kimsee zua. (Ansunsten miassat ma Keamsee schreibm) --Roland 01:28, 12. Feb. 2008 (CET)

Es mog scho sei, dass des "Chiemsee" mehra Aussprachn zualasst, aba es ändert nix an der Tatsach, das de mehran Leid aus meina Gengad Chieming ois Cheaming oda Chiemsee ois Cheamsee schreim , wenn's de boarische Bezeicnung sei soi. So wia Sondermoning Summering is, ohne das i des beweisn konn. I kon dir koa Wörtabiache aufführn, des woaßt genauso guat wia i. Aba wenns am Ort a gwachsne boarische Schreibweis gibt, und i kim vo da vo da Cheaminga Seitn, dann wissat i net, warum ma des dann auf hochdeitsch schreim miaßat. --Lou.gruber 20:35, 15. Feb. 2008 (CET)

Guad, du hosd recht. Und ois a Cheamgauer bist eh da Kompetenter. Mia ham ja grod zwoa Sahan ned gfoin: Oamoi dees "Offizielle" - da moanadi, miaßadma scho die "offizielle" Schreibweis lossn. Wos schdähd na bei a'r am Cheaminger im Ausweis drin? Dees andere wààr da Nama fom Chiemo. I moan, mia ham koa Recht, dàsma noch a por hundert Johr dem sein Nama ändan! - Gunther

I glaab da soit ma ins zweng da Schreibweis net streiten. Wann de mehrern Leit am Keamsee/Khiamsee "Keamsee" sogn und "Cheamsee" schreibm, not soit ma's aso macha. Beim Artikl iber Minga, Boazn ... steht ja aa net München, Bozen .... Mir kennan ja aa Umleitung von Chiemsee auf Cheamsee macha (I glaab de gibts eh scho). Bei der Schreibweis "ie" dengan hoit de mehrern Leit, daß wia im Hochdeitschn "ii" gsprocha werd und net a Zwilaut "ia" oder "ea". Bei Cheamsee kon ma a bisserl schneller seng wias zejm ausgsprocha werd.

Chiemo is ja da oide Nama, do daat i eher Chiemo schreibm und dazuaschreibm, daß ma's [Keamo] oder Kiamo ... ausspricht. I glaab so kannts fir olle bassn? --Roland 12:54, 16. Feb. 2008 (CET)

Liaba Roland! I schdreit mi ja neda - und i wui mi àà gor ned schdreitn! Im Gengteil, i find an Lou.gruber sein Schdandpunkt absolut in Ordnung! De oidn und richtign Nama fo de Ortschaftn usw. - genau dees muas do eini (Beischpui Summering / Sondermoning - ganz wichtig!). Mia is's ja grod um dees "offizielle" ganga. Boi dees Wort dafor schdähd, na kemma ned as boarische Wort hischreim, weil dees dààd ned schtimma!-- Gunther

Servus Gunther, Du moanst de offizielln Nama Herrenchiemsee und Frauenchiemsee? Do host scho Recht, de soit ma scho no hochdeitsch schreibm ;) Pfiat Di, --Roland 00:49, 23. Feb. 2008 (CET)