ബ്ലോഗര്‍ ഡോട്ട് കോം
വിക്കിപീഡിയ, ഒരു സ്വതന്ത്ര വിജ്ഞാനകോശം.
ബ്ലോഗര്‍ ഡോട്ട് കോം ഇന്റര്‍നെറ്റില്‍ സ്വയം‌പ്രകാശിത പേജുകള്‍ അഥവാ ബ്ലോഗുകള്‍ തയാറാക്കാനുള്ള വെബ്‌സൈറ്റുകളിലൊന്നാണ്. ബ്ലോഗ്സ്പോട്ട്, ബ്ലോഗര്‍ എന്നിങ്ങനെയും അറിയപ്പെടുന്നു. സ്വയം‌പ്രകാശിത പേജുകളെ പൊതുവായി വെബ്‌ലോഗ് എന്നാണു വിളിച്ചിരുന്നത്. ഇത് കാലക്രമേണ ബ്ലോഗ് ആയിമാറി. ബ്ലോഗ് എന്ന പദത്തില്‍ നിന്നാണ് ബ്ലോഗര്‍, ബ്ലോഗ്സ്പോട്ട് എന്നീ ബ്രാന്‍‌ഡ് നാമങ്ങളുണ്ടാക്കിയത്.
ബ്ലോഗ് പ്രസാധന സംവിധാനമുള്ള വെബ്‌സൈറ്റുകളില്‍ തുടക്കക്കാരാണു ബ്ലോഗര്‍. പൈറാ ലാബ്സ് എന്ന സ്ഥാപനം 1999 ഓഗസ്റ്റിലാണ് ബ്ലോഗര്‍ പുറത്തിറക്കിയത്. പെട്ടെന്നുതന്നെ ജനകീയമായി. 2003-ല്‍ പൈറാ ലാബ്സ് ഗൂഗിള്‍ ഏറ്റെടുത്തതോടെ ബ്ലോഗറിന്റെ ഉടമസ്ഥാവകാശം അവരുടെ പക്കലായി. ഗൂഗിളിന്റെ കയ്യിലെത്തിയതോടെ ബ്ലോഗര്‍ കൂടുതല്‍ ജനകീയമായി. ഇന്റര്‍നെറ്റില്‍ ചിത്രങ്ങള്‍ പങ്കുവയ്ക്കാനുള്ള സംവിധാനമായ പിക്കാസായുടെ ഉടമസ്ഥാവകാശവും ഗൂഗിള്‍ നേടിയെടുത്തതോടെ ബ്ലോഗറിനൊപ്പം ഫോട്ടോ ഹോസ്റ്റിങ് സംവിധാനവും ലഭ്യമായിത്തുടങ്ങി.
ബ്ലോഗര്‍ ഡോട്ട് കോമില്‍ രജിസ്റ്റര്‍ചെയ്ത് അംഗമാകുന്ന ആര്‍ക്കും ഇതിന്റെ സേവനങ്ങള്‍ സൌജന്യമായി ഉപയോഗപ്പെടുത്താം. യുണികോഡ് ഫോണ്ടുകള്‍ ഉപയോഗിക്കുന്നതിനുള്ള സംവിധാനമുള്ളതിനാല്‍ സങ്കീര്‍ണ്ണ ലിപികളുള്ള, ഇംഗ്ലീഷിതര ഭാഷകള്‍ ഉപയോഗിക്കുന്നവരും ബ്ലോഗര്‍ ഉപയോക്താക്കളായി.
വെബ്‌സൈറ്റുകളുടെ ജനകീയത നിരീക്ഷിക്കുന്ന അലക്സാ ഡോട്ട് കോമിന്റെ കണക്കുകള്‍ പ്രകാരം ഏറ്റവുമധികം സന്ദര്‍ശകരുള്ള വെബ്‌സൈറ്റുകളില്‍ ഒന്നാണ് ബ്ലോഗര്‍ ഡോട്ട് കോം. 2006 ഏപ്രില്‍ മാസത്തെ കണക്കുകള്‍ പ്രകാരം പതിനെട്ടാമതാണ് ബ്ലോഗറിന്റെ സ്ഥാനം.
