Jo Benkow
Frå Wikipedia – det frie oppslagsverket
Jo Benkow (fødd Josef Benkow, 15. august 1924 i Trondheim) er ein tidlegare norsk politikar for Høgre og stortingspresident. Han har vore stortingsrepresentant for Akershus Høgre i (1965–93), formann i Høgre (1980–84), formann i Høgres stortingsgruppe (1981–85) og stortingspresident (1985–93).
Familien flytta i barndommen hans til Bærum, der han vaks opp. I 1942 flykta han først til Sverige og deretter til Storbritannia for å sleppa unna nazistane sine jødeforfølgingar.
Etter at han vende attende til Noreg då krigen var slutt, arbeidde han som fotograf, eit yrke også far og bestefar hans hadde. Han har behalde ei sterk interesse for fotografi, og vert jamnleg invitert til å opna fotoutstillingar og som æresgjest på andre tilstellingar innan fotobransjen.
Han har også skrive nokre bøker, m.a. Fra synagogen til Løvebakken (1985), Olav - menneske og monark (1991) og Hundre år med konge og folk (1998).
Etter sin siste periode på Stortinget har Benkow vore ein etterspurd foredragshaldar i mange samanhengar, særskilt i høve til tema som dreier seg om Midt-Austen og antisemittisme.
I 1999 kom han med i styret for Treffpunkt, ei nettavis for eldre, som vart etablert av NRK-veteranen Per Øyvind Heradstveit.
Det vekte oppsikt då han gjekk til åtak på tidlegare statsminister og partifelag Kåre Willoch for å vera «den mest partiske person i landet» i samband med Willoch sitt engasjement for palestinarane.
Benkow har vore president i Den internasjonale Helsingforsføderasjonen, og i Sakharovs Fridomsfond.
