Life on Mars?
Frå Wikipedia – det frie oppslagsverket
«Life on Mars?» var ein song og singel av David Bowie på albumet hans Hunky Dory frå 1971. Songen inneheld piano av gjesteartisten Rick Wakeman, som då spelte i Yes.
Opphavet til songen kom frå ein episode som skjedde eit par år tidlegare då Bowie vart spurt om å skrive engelsk tekst til ein fransk song kalla «Comme d’habitude». Han skreiv teksten og kalla songen «Even a Fool Learns to Love». Den kanadiske låtskrivaren Paul Anka kjøpte derimot rettane til den franske originalen og skreiv sin eigen engelske tekst, og kalla songen «My Way», som seinare vart gjort vidkjend av Frank Sinatra. Bowie si utgåve vart aldri gjeve ut. «Life on Mars?» var Bowie sitt motstøt mot at han mista sjansen til å få gjere denne franske songen, og «Life on Mars?» har akkurat same akkordprogresjon som «My Way», og som Bowie seinare forklarte i eit intervju var songen ei «modernistisk utgåve» av Anka/Sinarta-songen.
Songen er delt i to delar. Den første delen handlar om ei jente som rømer til ein kino etter ein krangel med foreldra, men syns filmen er «a saddening bore/For she's lived it ten times or more.» Den andre delen av songen er stemma til filmmakaren, som på liknande måte snakkar om at han er misnøgd med sin eigen film («'cause I wrote it ten times or more»). Refrenget avsluttar med spørsmålet «is there life on Mars?», som om verken jenta eller Bowie kan tru at dette er alt livet på Jorda har å tilby. Teksten er til tider noko underleg, med forvirrande linjer som «It's on America's tortured brow/That Mickey Mouse has grown up a cow» eller «Now the workers have struck for fame/'Cause Lennon's on sale again.»
Songen vart gjeve ut på singel i juni 1973, og har lenge vert rekna som ein klassikar som er mykje spelt på radio. For å promotore singelen laga Mick Rock ein enkel, men påfallande promovideo, der Bowie i dress syng songen solo føre ein heilt kvit bakgrunn. Singelen nådde tredjeplass på den britiske singellista, og haldt seg der i 13 veker.
I februar 1999 førte musikkmagasinet Q opp singelen som ein av dei 100 største singlane gjennom tidene, stemd fram av lesarane. Den har haldt fram med å dukke opp på Q sine lister av denne typen, sist i 2006 då den havna på 45. plass. I 1986 stemde lyttarane på BBC Radio 2 i Storbritannia fram songen som Bowie sin beste nokonsinne.
Innhaldsliste |
[endre] Innhald
- «Life on Mars?» (Bowie) – 3:48
- «The Man Who Sold the World» (Bowie) – 3:55
Den portugisiske utgåva av singelen hadde «Black Country Rock» som b-side.
[endre] Medverkande
- David Bowie: vokal og gitar
- Mick Ronson: gitar
- Trevor Bolder: bass på «Life On Mars?»
- Tony Visconti: bass dei to andre songane.
- Mick Woodmansey: trommer
- Rick Wakeman: piano på «Life on Mars?»
- Ralph Mace: Moog-synthesizer på «The Man Who Sold the World»
- Produsert av:
- Ken Scott på «Life on Mars?»
- Tony Visconti på «The Man Who Sold the World»
[endre] Andre utgåver
- 1. oktober 1972 spelte Bowie songen ved The Music Hall i Boston. Denne vart gjeve ut på bonusdiskutgåva av Aladdin Sane - 30th Anniversary Edition i 2003.
- Ei annan konsertutgåve vart spelt inn ved Santa Monica Civic Auditorium i Los Angeles, 20. oktober 1972 og vart gjeve ut på Santa Monica '72.
[endre] Kjelder
- Pegg, Nicholas, The Complete David Bowie, Reynolds & Hearn Ltd, 2000, ISBN 1-903111-14-5
- BBC Radio 2 si side om songen
