Viktor Janukovytsj
Frå Wikipedia – det frie oppslagsverket
Viktor Fedorovytsj Janukovytsj (ukrainsk Віктор Федорович Янукович), fødd 9. juli 1950 i Jenakijeve i Donetsk oblast, er ein ukrainsk politikar og statsminister i Ukraina sidan 4. august 2006. Han var òg statsminister frå 21. november 2002 til 31. desember 2004. Han leiar Partija regioniv (Regionanes parti).
Faren til Janukovytsj var etnisk kviterussisk, mora ukrainsk.
Janukovytsj vart utnevnd som statsminister av president Leonid Kutsjma i 2002. Ved det kontroversielle presidentvalet i 2004 stilte ikkje Kutsjma til gjenval, men støtta Janukovytsj sitt kandidatur. Han vart rekna som den pro-russiske kandidaten, og hadde størst oppslutning i den austlege, russiskdominerte delen av Ukraina. Han vart utropt til vinnar av valet med knapp margin etter andre valomgang 21. november 2004. Dette utløyste dei omfattande gateprotestane som vart kalla den oransje revolusjonen, grunna anklagar om valfusk. Til slutt førte protestane til at andre valomgang vart avlyst og heldt på nytt 26. desember, då Janukovytsj tapte med 44,2 % av røystene mot 52,0 % for Viktor Jusjtsjenko. Etter dette gjekk Janukovytsj òg av som statsminister.
Ved parlamentsvalet 26. mars 2006 gjorde Janukovytsj eit oppsiktsvekkjande comeback då partiet hans vart det største partiet i nasjonalforsamlinga med 32,1 % av røystene. Partiet hans vann i dei austlege og sørlege delane av landet. Etter langvarige forhandlingar klarde erkerivalane Jusjtsjenko og Janukovytsj og nå fram til ein avtale som gjorde Janukovytsj til statsminister på nytt frå 4. august 2006.
| Føregjengar: Anatolij Kinakh |
Statsminister i Ukraina |
Etterfylgjar: Mykola Azarov |
| Føregjengar: Jurij Jekhanurov |
Statsminister i Ukraina (2006–)
|
Etterfylgjar: |
 |
Denne samfunnsartikkelen er ei spire. Du kan hjelpe Nynorsk Wikipedia å vekse seg stor og sterk gjennom å utvide han.
Sjå òg: Oversyn over samfunnsspirer. |
