Bombai
Un article de Wikipèdia, l'enciclopèdia liura.
Bombai (nom occitan) (en marata Mumbai, en anglés oficial Mumbai dempuèi 1995, en anglés tradicional Bombay), es la capitala de Maharashtra, un estat d'Índia occidentala. Es la ciutat pus granda d'Índia e una de las sièis aglomeracions pus grandas del Mond. Es una vila costièra d'a pauc près 18,1 milions d'abitants situada dins una baia prigonda.
Lo nom Mumbai es un epònim, derivat etimologicament de Mumba (lo nom de la deessa hindú locala Mumbadevi) e d'Aai (que vòl dire "maire" en marata). Al segle XVI, los portuguesés an nomenats l'airal Bom Bahia, es a dire "baia bona". Lo nom a evolucionat cap a Bomaím, e un còp presa pels britanics, lo nom foguèt anglicizat en Bombay.
Bombai es la capitala comerciala de l'Índia, es lo sètge d'importantas institucions financièras coma la Reserve Bank of India, la Borsa de Bombai (Bombay Stock Exchange) e las oficinas centralas de mantuna entrepresas índianas. A causa de las immensas oportunitats de negòci que i a a Bombai e del nivèl de vida relativament naut, la ciutat atira d'immigrants d'Índia tota e del sud-èst d'Asia, causa que n'a fach una veritabla barreja de comunitats e culturas.
S'i troba tanben lo centre neuralgic de l'industria índiana del cinèma e de la television, lo complex nomenat Bollywood (nom creat a semblança d'Hollywood USA), que produis lo pus grand nombre annal de films del mond. Bombai es tanben una de las raras ciutats que tenon un pargue nacional dins las sieunas limitas municipalas, lo Sanjay Gandhi, o Borivali.
