Fenolhedés
Un article de Wikipèdia, l'enciclopèdia liura.
Fenolhedés o la Fenolheda es un parçan d'Occitània e de lenga occitana, dins la region istorica de Lengadòc, situat essencialament dins lo departament francés dels Pirenèus Orientals e tanben un pauc dins lo departament d'Aude amb la Val de Santa Crotz. Fenolhedés confronta al nòrd e a l'oèst los parçans occitans de las Corbièras e del País de Saut (Lengadòc) e al sud las comarcas catalanas de Rosselhon e Conflent (la màger part dels Pirenèus Orientals, fòra Fenolhedés, se compausa de cinc comarcas catalanas).
Sa capitala es Sant Pau de Fenolhet.
[Modificar] Istòria
Fenolhedés formava inicialament una partida del comtat de Rasés. En 870, devenguèt possession del comte d'Urgèl e de Cerdanha e l'abadiá de Sant Miquel de Cuixà i espandiguèt las sieunas possessions en creant lo monastèri de Sant Pau de Fenolhet. En 990 passèt jol vassalatge dels comtes de Besalú fins a 1111 e posteriorament dels comtes de Barcelona.. Los ligams feudals se van complicar entre los comtes de Barcelona, de Fois, de Tolosa e de Carcassona, e la crisi de la Crosada dels Albigeses. Fins finala amb lo Tractat de Corbeil (1258), Fenolhedés va passar definitivament a la corona francesa. Apuèi lo Tractat dels Pirenèus, Fenolhedés s'incorporèt al departament dels Pirenèus Orientals, levat la Val de Santa Crotz qu'es dins lo departament d'Aude.
