Raffieli Lummardu
Di Wikipedia, l'enciclopedìa lìbbira.
Raffieli Lummardu (oppuru, 'n lingua taliana, Raffaele Lombardo) (Catania, 29 di uttùviru 1950) è n'omu pulìticu sicilianu, parlamintari eurupeu e prisidenti dâ Pruvincia di Catania.
Lauriatu 'n midicina e chirurgìa, participau â fini di l'anni 1970ini â juvintù dâ Dimucrazzìa Cristiana catanisa e cu la DC attacca a fari carrera a l'ùmmira di Calòggiru Manninu, nzinu a divintari ntô 1991 diputatu â Riggiuni Sicilia e quinni macari assissuri di l'enti lucali. Luntanu dâ pulìtica pi cunziquenza dê fatti di Tangintòpuli, finuti cu dui arristati, e doppu èssiri statu assortu dû scànnalu giudizziariu, Lummardu si prisenta dû novu ntô Centru Cristianu Dimucràticu di Pier Ferdinando Casini, pi passari succissivamenti dû novu a l'UDC ristànnuci nzinu ô 2005.
Ntô cuntempu addiventa euruparlamintari ntô 1999, vici-sìnnucu di Catania ntô 2000 e prisidenti dâ Pruvincia di Catania ntô 2003, ufficiu ca teni tutt'oi. Ntô 2004 veni ricunfirmatu euruparlamintari.
Ntô maiu 2005 custituisci quattru listi, ntra chisti lu Muvimentu pi l'Autonumìa, ca, cugghiennu cumprissivamenti lu 20% dê prifirenzi, s'addimùstranu dicisivi pi rielèggiri Ummertu Scapagnini (Forza Italia) sìnnucu di Catania.
'N sècutu a l'accusi di gistioni anti-dimucràtica dû partitu ca ci vutaru li espunenti quarantinni dâ UDC siciliana, ê richiesti di cummissariamentu dê stissi, cu lu arrivu di Luca Volontè, 'n qualità di supravisuri, e di Francesco D'Onofrio 'n qualità di cummissariu, Lummardu nesci difinitivamenti dâ UDC e s'abbìa 'n capu lu sò Muvimentu pi l'Autonumìa privalentimenti supra scala centru-miridiunalista, câ ntinzioni di custituiri nu terzu polu, n altirnativa ê schieramenti tradizziunali, comu già succiudìu a l'elizzioni cumunali di Missina dû nuvèmmiru 2005, unni era alliatu cu lu euruparlamintari, ca vinìa di Allianza Nazziunali, Nellu Musumeci e la sò Allianza Siciliana, nasciuta ntô sittèmmiru 2005.
A l'elizzioni pulìtichi dû 2006 addiveni alliatu dâ Lega Nord, facennu lu Pattu pi li Autonumìi ca si schiera câ Casa dî Libbirtà e Silviu Berlusconi, ca ntô prugramma di cuvernu metti li punti prugrammàtichi pô sviluppu dû Sud dû paisi.
