Kám-mō͘
Wikipedia (chū-iû ê pek-kho-choân-su) beh kā lí kóng...
Kám-mō͘ (hong-siâ, siong-hong) sī téng ho͘-khip hē-thóng (phīⁿ-á kap nâ-aû) khì hō͘ pēⁿ-to̍k oè--tio̍h ê 1 chióng thoân-jiám-pēⁿ. Chèng-thaû phēng liû-hêng-sèng kám-mō͘ khah un-hô, pau-koah ē phah-kha-chhiùⁿ, chhǹg-phīⁿ, sat-phiⁿ (nasal congestion); nâ-aû chiūⁿ-chiūⁿ (scratchy), sng-thiàⁿ (sore), ū thâm; ka-saù, thaû-thiàⁿ, lâng siān-siān téng-téng. Tiāⁿ ē koâⁿ beh 3-5 kang, soà--lo̍h siōng kú koh saù beh 3 lé-pài. Kám-mō͘ sī lâng siōng chia̍p hoat-seng ê pēⁿ, 1 ê lâng 1 nî pêng-kin ē tio̍h 1 pái khah ke; ū ê só͘-chāi koh ē chhiau-koè 3 pái. Gín-á, kò͘ gín-á--ê, ha̍k-haū, chhù--nih siōng-kài ē tì tio̍h kám-mō͘.
Kám-mō͘ kap liû-kám bô kâng. Tio̍h liû-kám ē hoat-sio kah chin lī-hāi, ùi-koâⁿ, sin-thé kap kin-bah sng-thiàⁿ (muscle aches). Kám-mō͘ khah bē sí-lâng, m̄-koh nā tì-kaù hì-iām tō chin gûi-hiám.
Kám-mō͘ ê pēⁿ-to̍k piàn-hoà thài kín, kaù taⁿ e̍k-biâu iáu chò bô lō͘ lâi.
