Dan Roodt
vanuit Wikipedia, die vrye ensiklopedie.
Daniël François Roodt is 'n Afrikaanse skrywer en politieke aktivis. Hy is in 1957 op Springs aan die Oosrand gebore. Hy slaag matriek aan die Hoër Seunskool Helpmekaar en studeer daarna Afrikaans, filosofie en staatsleer aan die Universiteit van die Witwatersrand waar hy uiteindelik in Afrikaanse letterkunde promoveer met die proefskrif "Ondermyning in die prosa van John Miles: 'n postmoderne lesing". In 1985 vlug hy en sy vrou Karin na Frankryk, in ’n poging om diensplig te ontduik. Hy woon agt jaar daar terwyl hy onder andere lesings bywoon van bekende Franse filosowe soos Jean-François Lyotard, Gilles Deleuze, Alain Badiou, Hélène Cixous, Jacques Rancière, Jacques Derrida en ander. Hy verwerf 'n D.E.A. (Diplôme des Etudes Approfondies) in Franse filosofie onder René Scherrer, 'n kollega van Gilles Deleuze.
Terug in Suid-Afrika vanaf 1992 lê hy hom op die finansiële markte toe en verhandel finansiële instrumente soos opsies en rentekoersruiltransaksies vir verskeie handelsbanke in Johannesburg. In 1999 bedank hy by Citibank en praktiseer aanvanklik as finansiële konsultant maar raak toenemend betrokke by die taalstryd rondom Afrikaans, asook die openbare debat rondom kultuur en politiek. In Februarie 2000 stig hy die Pro-Afrikaanse Aksiegroep (PRAAG) wat hom vir die Afrikaanse taal en 'n herlewing van Afrikanerpolitiek beywer.
As student reeds publiseer hy 'n satiriese digbundel en kort roman. Aanvanklik is sy werk anti-establishment en daag hy die konservatiewe Afrikaanse letterkunde gemeenskap in die 1980's uit met werke soos Sonneskyn en Chevrolet en Kommas uit 'n boomzol. Hy word selfs saam met Ampie Coetzee deur die UWC-Robben Island Mayibuye Archives as 'n progressive Afrikaans writer beskryf [1]. Van sy werk is dan ook deur die Apartheidregering verban[2]. In die 1980's maak hy bydraes tot Stet en publiseer hy en Karin Konsentrasiekamp, met wie hy later getroud is, Taaldoos wat terstond deur die Apartheidregering verban word. Oor die afgelope paar jaar benewens 'n groot aantal artikels op die internet, koerante en tydskrifte, verskyn daar uit sy pen Om die Waarheidskommissie te vergeet (opstel), Moltrein (roman) en The Scourge of the ANC ('n politieke polemiek). Sy jonger werk staan krities teenoor wat hy as kulturele relativisme beskou, asook Afrikanisme en hy spreek hom teen transformasie en die ongelyke behandeling van minderheidsgroepe in Suid-Afrika uit. Sy uitsprake gee aanstoot onder akademici en hy word onder meer van haatspraak en rassisme beskuldig[3]. Die jonger werk het 'n kultuurkritiese inslag . Hy beweer byvoorbeeld in Adapt and die[4] dat swartes in Suid-Afrika, asook in die VSA, proporsioneel meer misdaad as blankes pleeg en spekuleer oor die moontlike oorsaak van sulke aggressie wat in die hoër testosteroonvlakke van swart mans teenoor blanke mans mag skuil.
Sy mees onlangse publikasie is Aweregs (politieke essays).
[wysig] Bibliografie
Sonneskyn en Chevrolet. Roman. Johannesburg: Taurus, 1980.
Kommas uit 'n boomzol. Gedigte. Johannesburg: Uitgewery Pannevis, 1980.
Twee sinne. Prosateks. Johannesburg: Taurus/Stetboek, 1985.
Om die Waarheidskommissie te vergeet. Opstel. Johannesburg: Praag, 2001.
Moltrein. Roman. Johannesburg: Praag, 2004.
The Scourge of the ANC. Politieke opstelle. Johannesburg: Praag, 2005.
Die gelofte as logos. Rede. Johannesburg: Praag, 2005.
Aweregs. Politieke essays. Johannesburg: Praag, 2006.
As mede-vertaler:
Stephen Smith. Negrologie - waarom Afrika vergaan. Johannesburg: Praag, 2005.
[wysig] Eksterne skakels
- Jacob Olsen se droom oor Dan Roodt se 2011 kersfees.
- Praag-webwerf waar 'n groot aantal van Dan Roodt se artikels te siene is
- Dan Roodt — die mens agter die aktivis en Not a question of censorship, Litnet, artikels oor Dan Roodt
[wysig] Verwysings
- ↑ UWC-Robben Island Mayibuye Archives ORAL HISTORY AND SOUND
- ↑ Encyclopædia Britannica - South Africa: Cultural life > The arts
- ↑ Die Burger - Dan Roodt 'nie welkom by Woordfees'
- ↑ PRAAG - Adapt and die - South Africa's new motto
