Drakebootfees
vanuit Wikipedia, die vrye ensiklopedie.
Die drakebootfees is een van die oudste feeste wat jaarliks in Sjina gevier word, op die 5de dag van die 5de maanmaand (die datum val gewoonlik in Junie van die Gregoriaanse kalender). Algemeen word die fees beskou as een van die vier belangrikste jaarlikse feeste in China. Die fees word gehou as 'n dankdiens vir kos en water tydens die droë seisoen. Tydens die drakebootfees word een van Sjina se vroegste digters Qu Yuan (340 v.C. - 278 v.C.) se lewe herdenk.
Die fees word gehou deur draakbootwedvaarte te hou en Zongzi (of Tsungtzu) te eet. Die draakbootwedvaart word begelei met harde dromslae, wat ritme aandui vir die roeiers. Volgens tradisie vaar die draakbote uit op die rivier om die lewe van die Qu Yuan te red. Zongzi is saamgeperste gekookte ryskoekies wat toegevou word in plantblare en vasgebind word met 'n gekleurde toutjie. Tradisioneel roei deelneemers aan die fees uit op die rivier met draakbote. Later het die mense begin om die ryskoekies te eet as deel van die feesverigtinge.
Volgens oorlewering het Qu Yuan homself verdrink in die Miluorivier in die provinsie Hunan, nadat die koning geweier het om na sy raad te luister. Die tradisie het begin toe sy ondersteuners na sy liggaam gesoek het. Die ryskoekies is op die water geplaas om die visse te voer en sodoende te voorkom dat die liggaam deur die visse opgevreet word.
[wysig] Bronnelys
- Common Knowledge of Chinese Culture
- China in brief
- FAQ - Traditional festivals
- Wikipedia: Traditional Chinese holidays
- Die Groot geïllustreerde ensiklopedie Bl. 149
