Grandma Moses
vanuit Wikipedia, die vrye ensiklopedie.
Anna Mary Moses - beter bekend as Grandma Moses (7 September 1860 – 13 Desember 1961) was 'n bekende Amerikaanse volkskunstenares, wat met haar sowat 1 500 skilderye Amerika se Naïewe Kuns verryk het. Sy word dikwels aangevoer as 'n tipiese voorbeeld van 'n kunstenares, war haar loopbaan op 'n redelike gevorderde ouderdom begin het.
Sy is in Greenwich (New York) gebore as Anna Mary Robertson. Sy het reeds as 'n kind met vrugtesap op houtstukke of ander materiaal, wat haar pa vir haar tuisgebring het, geskilder. Terwyl die ander kinders van die gesin lekkers gekry het, het Anna liewer skildermateriaal gekoop, aangesien dit volgens haar langer sou aanhou as lekkers.
Sy het die grootste deel van haar lewe deurgebring as 'n boerevrou en moeder van vyf kinders. Sy het in 1887 met Thomas Solomon Moses getrou. Hulle het eers in die Shenandoahvallei gewoon en hulle later in Eagle Bridge (New York) gevestig.
Sy was al meer as sewentig jaar oud toe sy weer begin skilder het, nadat sy 'n loopbaan in die borduurwerkbedryf weens artritis moes beëindig. In 1938 het die kunsversamelaar Louis J. Caldor haar skilderye in die venster van 'n drugstore in Hosick Falls ontdek. In die volgende jaar het die kunshandelaar Otto Kallir sommige van haar kunswerke in sy Galerie Saint-Etienne in New York vertoon. Grandma Moses het sodoende die aandag van kunsversamelaars van dwarsoor die wêreld getrek, en haar skilderye het uiters gesog geraak. Van haar kunswerke is orals in Europa uitgestal - en selfs in Japan, waar haar skilderye baie gewild geraak het. Sy het voortgegaan om te skilder, en haar kuns het haar hele lewe lank gewild gebly.
Haar skildery The Old Checkered Inn in Summer is in 1946 as die agtergrondbeeld van 'n nasionale reklameveldtog vir Du Barry Cosmetics se die Primitive Red-lipstiffie gebruik.
Grandma Moses het in 1949 die Women's National Press Club se toekenning vir haar prestasies in die kunswêreld uit die hande van president Harry S. Truman ontvang. In 1951 het sy in See It Now, 'n televisieprogram wat deur Edward R. Murrow aangebied is, opgetree. Haar outobiografie Grandma Moses: My Life's History is in 1952 gepubliseer.
Grandma Moses het haar gunstelingmotiewe in die landelike lewe gevind. Sommige van haar skilderye is op die voorblad van Hallmark-kaarte gebruik.
Op 7 September 1960 het Grandma Moses haar 100ste verjaarsdag gevier. Cornell Capa het in opdrag van die tydskrif Life by hierdie geleentheid 'n portretfoto van haar geneem, wat op die titelbladsy verskyn het. Die goewerneur van New York, Nelson Rockefeller, het ter ere van haar die "Grandma Moses-Dag" geproklameer.
Grandma Moses is op 13 Desember 1961 in Hoosick Falls oorlede en op die Maple Grove-begraafplaas ter ruste gelê. Haar grafsteen dra die grafskrif: "Haar skilderye het die gees en die natuurtoneel van 'n verdwynende platteland uitgebeeld." Sy het die meeste van haar kinders oorleef.
[wysig] Uitstallings
Grandma Moses het met haar skilderye veral die eenvoudige lewe op die destydse Amerikaanse platteland uitgebeeld en hierby ook baie van haar persoonlike ervarings verwerk. Omtrent dertig van haar mees belangrike kunswerke word permanent in die museum van Bennington in die deelstaat Vermont uitgestal.
[wysig] Eksterne skakels
- Grandma Moses-galery in die museum van Bennington
- Voorbeelde van haar skilderye, van die Cal Poly Pomona-webblad
- 'n Bladsy oor Grandma Moses by die Galerie Saint-Etienne in New York
- "Memory is a Painter" - die New Britain Museum of American Art se bladsy oor Grandma Moses
