Feusisberg

Us der alemannische Wikipedia, der freie Dialäkt-Enzyklopedy

Wappe

Basisdate
Kanton:	Schwyz
Bezirk:	Höfe
BFS-Nr.:	1321
PLZ:	8835
Koordinate:	47° 11' n. Br. 8° 45' ö. L.
Höchi:	685 m ü. M.
Flächi:	17.56 km²
Iwohner:	4291 (31. Dezember 2005)
Websyte:	www.feusisberg.ch
Charte

Dialäkt: Züridütsch (See)

Feusisberg isch e politischi Gmeind im Bezirk Höfe vom Kanton Schwyz i dr Schwiiz. Zu Feusisberg ghöred au d Ort Schindellegi und Biberbrugg.

[ändere] Wappe

Di beide Rabe im Wappe erinnered a d Einsiedler Saag vom Meinrad vo Einsidle (Mönch, † 861). Di wiisse Jakobsmuschle symbolisiered de Chilepatron hl.Jakob d. Ä.

[ändere] Geographie

D Gmeind Feusisberg befindet sich uf ere Höheterrasse am Etzel. Am Iischnitt wo d Sihl sich zwüsched Etzel und Höhrone gschaffe hät liit dr Ort Schindellegi. Es Drittel vo dr Gmeindflächi isch bewaldet.

Landwirtschaft im Berggebiet - Feusisberg über em Zürisee

[ändere] Bevölkerig

Bevölkerigsentwicklig
Jahr	Iiwohner
1743	649
1799	110
1833	1099
1850	991
1870	1121
1880	1241
1888	1348
1900	1276
1910	1348
1920	1534
1930	1573
1941	1627
1950	1654
1960	1761
1970	2173
1980	2829
1990	3178
2000	3843
2003	4075
2004	4145

Dr gröschti Teil vo dr Bevölkerig wohnt in Schindellegi. Dur di gueti Verchehrsverbindige uf Züri, Rapperschwiil und Schwyz lebed au viili Pendler i dr Gmeind Feusisberg.

[ändere] Wirtschaft

Im Ort Schindellegi händ sich bereit im 19. Jahrhundert e Schpinnerei und anderi vo dr Wasserchraft vo dr Sihl abhängigi Firme aagsiedlet. Entlang vom Flusslauf isch so es chliises Induschtriegebiet entschtande in dem sich hüt verschiedeni Gwerbbetrieb iimieted. Us schtüürliche Gründe händ au Grossfirme de Hauptsitz uf Schindellegi verleit.

[ändere] Gschicht

Di schtrategisch Laag vom Ort Schindellegi am nordöschtliche Zuegang zur Innerschwiiz und em Sattel hät sich vom Mittelalter bis is 20. Jahrhundert uf d Gschicht vo dr Gmeind uusgwürkt. Dr Ort liit uf em Jakobsweg und isch i dr Vergangeheit en Durchgangsort für d Pilger uf Santiago de Compostela gsii.

Dr Ort Schindellegi wird als Schindel-Lagerplatz 1220 erschtmals erwähnt. Im 13. Jahrhundert wird Feusisberg als "Uffenberge" erwähnt. Dr Name vom Ort (im 16. Jahrhundert "Fessiskilch" gschribe) leitet sich vom Gschlecht vo de Feusi ab.

Im alte Zürichrieg zwüsched 1439 und 1450 wird Schindellegi zweimal dur Truppe bsetzt. S gliiche passiert während de beide Kappelerchriege 1529-1531 dur d Schwyzer.

1620 reglet dr Schindellegi-Brief de Wareverchehr dur de Übergang uf Sattel.

Wiiter Bsetzige vo Schindellegi i de Villmergerchriege 1656-1712. Di französische Truppe verwüeschted Feusisberg und Schindellegi i de Jahre 1798-1799.

Us de Dörfer Feusisberg und Schindellegi wird 1848 d Gmeind Feusisberg ggründet. Mit em Bau vom Kurhuus Feusisgarte 1857-1858 und ere Baumwullschpinnerei i Schindellegi 1869 überchunnt d Wirtschaft en gwüsse Uufschwung, wo 1877 dur de Aaschluss vo Schindellegi a d Isebahnschtrecki Wädischwiil-Einsiedle no verschtärcht wird.

Bim Bau vom Reduit werded vo 1939 bis 1945 schtarchi Befeschtigige im Gmeindsgebiet aagleit.

Feusisberg isch dr Uufenthaltsort vo dr Schwiizer Fuessball-Nationalmannschaft vor ere Europa- oder Weltmeischterschaft.