Astures
De Uiquipedia
Los Astures (o ástures) fueron un pueblu asitiáu nel noroeste de la Peninsula Ibérica, el so orixen nun ta nidiu y hai dos postures principales. Una qu'indica la posibilidá que llegaren dende'l ríu Ister (nome en griegu del Danubiu) y la zona d' Estiria (Austria), pola coincidencia de los nomes y la esplicación del nome d'esti pueblu como raigañu celta o indoeuropéu. Y otra siñala que les poblaciones astures son la evolución de los habitantes asitiaos na zona dende'l Mesolíticu o escomienzos del Neolíticu y son la evolución cultural de les poblaciones que fixeron pintures como Tito Bustillo, o nel casu de los cántabros, Altamira; básase nes relaciones culturales ente tolos pueblos de la Península Ibérica y Aquitania.
Tabla de conteníos |
[editar] El nome
Paez ser qu'esti nome dieron-ylu los romanos nel so contautu, el nome provenía de la denominación del ríu Esla na llingua indíxena y el so significáu puéde esplayase pol vascu antigu como agua ente piedres. Esta teoría ye la más aceutada polos hestoriadores, llingüistes y arqueólogos si bien esisten otres que lu espliquen pol raigañu celta -str que significa tamién ríu.
En cuanto a que, Astura, seya l'Esla, el Seya o cualaquier otru ríu, esplícase en favor del primeru pol tamañu, ye dicir cuando los romanos contauten colos astures faenlo pela Meseta y pel ríu más grande de la rexón, que ye l'Esla. Si bien, tamién hai razones pa decantase pol Seya, la mayoría d'estudios consideren que ye'l ríu llionés del que deriva la designación romana pa esti pueblu.
Anguaño nes Ciencies Hestóriques empléguense dos nomes; ástures pa referise a les poblaciones prerromániques del conventu d'Asturica Augusta -actual Astorga-, y astures pa les poblaciones que calteníen la cultura, llingua y relixón nes dómines hestóriques y altomedievales de los reinos Astur y de Llión.
[editar] Tribus y clanes
• Trasmontanes
Los Pésicos: Argamonicos.
Los Llugones: Ablaidacos, Abilicoros, Agubrigenses, Arganticaenos, Argantorios, Arronidaecos, Cabranginos, Cadabrigenses, Coliacinos, Cilúrnigos, Vincianos, Viromenigos y Oilaridos.
Los Penios: Caelionicaecos y Quetianos.
Los Cabarcos: Berisonis.
•Cismontanes o Augustanes
-Los Gigurros:
-Los Zoeles: Desoncos, Tridiavos, Visaligos, Cabruagenos.
-Los Orniacos: Avolgigos.
-Los Saelenos:
-Los Superatios: Blanobriensos, Bolgenses, Louguios.
-Los Tiburos:
-Los Bedunienses:
-Los Lancienses:
-Los Brigaecinos:
-Los Amacos: Saldanicos.
-Los Lóugei:
-Los Iburros:
[editar] Afiliación
L'afiliación d'estes poblaciones ye percomplicada d'entamar, dao les poques fontes y l'ausencia de lliteratura. Sí conocemos, que yeren matriarcales o que taben nel procesu del pasu d'esti al patriarcáu, cosa que los alluenxaría de los celtes y poblaciones indoeuropees. Muncha de la toponímia esplícase por el vascu antigu pero tamién pol celta ou el lusitanu. Tamién paez que taben en contautu con poblaciones celtes o averaes a esta cultura, si qu'asina nun se puede afirmar que fueren celtes, munches de les concomitancies ente dambes cultures débense a procesos de resolución cultural común ente los pueblos del mundiu. Poro, davezo inclúyense nun grupu nomáu Pueblos del Noroeste formáu por galáicos, cántrabros, vascones, autrigones, várdulos y carístios.
[editar] Xeografía
Los Astures ocupaben el norte de Zamora, casi que tola provincia de Llión, sacante la zona oriental, y casi toa Asturies(dende'l riu seya nel Esti per onde llinden colos pueblos cantabros, fasta la sierra el Ranadoiru pel Oeste onde llinden colos Albiones). Según Plinio la población Astur sedría d'unos 240.000 hab.
Les principales ciudaes o asentamientos de los que se tienen constancia son por referencies de los autores grecollatinos o pola arqueoloxía. Considérase que'l principal asentamientu de los astures yera Lancia, nel oteru de Lance, en Sollanciu (Villasabariegu, Llión), que foi una mena de Numancia astur. Pero tamién esisten referencies y restos d'asentamientos grandes en:
- Aliga ¿(Alixa)?, Llión.
- Asturica Augusta (Astorga.
- Legio VI-VII Llión).
- Arrabalde, Zamora. Famosa pol Ayalgu d'Arrabalde, quiciabes la mayor representación artística d'esti pueblu.
- Brigarentium ¿Benavente?.
- Degaña, Asturies.
Amás de multitú de castros de los que queden restos en Xixón, La Cabreira, La Valduerna, la Valdería, el Bierzu, los restos funerarios de los Valles de Benavente.
[editar] Forma de Vida
Basaben la so vida na recoyida de frutos y la cacia. Demientres gran parte el añu usaben la Llande como el so alimentu fundamental, secandolu, mayandolu y depués con la so farina facien un pan que se-yos conservaba durante llargu tiempu. Contaben tambien con la agricultura aunque yera escasa, na que ver cola de pueblos mas sureños.
Les tierres semaes na dómina prerromana yeren escases,d'estos semaos sacaben cebada cola que facien cerveza, asina como especies primitives d' escanda y cerru. Debio a esta entreseca y al so cermuñu calter guereru facien incursiones frecuentes na tierra los Vaceos,los cuales sí tenien perdesarrollada l'agricultura.
Según autores clásicos la so estructura familiar yera matriarcal:la muyer yera propietaria y heredaba.
Los Astures poblaben en castros, ubicaos en llugares estratexicos y amurallaos, onde les cabañes yeren circulares na actual Asturies y en dómines inhóspites de Llión, y retangulares en dómines más llanes.
Vistíen con sayos apretaos, siendo un vezu xeneral en toles tribus cantábriques. Les muyeres decorábenlos con materies vexetales de gran collor. Los homes llevaben melenes que ceñien con cintes nel combate. EL calzáu sedría asemeyao a les actuales abarques.
Tenien un gran conocimientu del mediu natural, usando plantes medicinales. A los enfermos sacábenlos a los cruces de los caminos por si dalgún viandante conociese la cura a dicha enfermedá.
L'armamentu principal ente los Astures yera'l dardu; usaben escudos tantu pequeños comu grandes pero toos ellos en forma circular, el puñal y la espada curtia d' antenes tamién yeren utilizaos, la falcata utilizada posiblemente debío a influencies d'otros pueblos peninsulares, tamién les haches de doble filu, les fondes y les lanzes yeren armes usaes per estes tribus. Enfrentaronse a Roma prauticando guerra de guerrilles, executando emboscaes y maniobrando en terrenos pindios onde lluchaben a caballu. Fueron famosos los sos caballos y la so caballeria. En tando dominaos por Roma, alistabense comu temibles mercenarios, na muria d'Adriano construyida por Roma pa protexer los sos dómines de invasiones de los Pictos. Tiense constanza de dos ales de caballeria astur que llucharon comu mercenarios.
Usaben barques de cuero cosíes, onde namás la quilla yera de madera, barcos asemeyaos a los usaos por Lusitanos y Saxones.
Hai que destacar que yeren perbonos orfebres como se puede ver nel Ayalgu d'Arrabalde o na Diadema de Moñes, lu que se xunía al so trabayu como mineros como queda amosáu nes mines de La Cabreria (las Medulillas, Benuza) y del Bierzu, (las Médulas).
[editar] Relixosidá
Al igual qu'otres cultures posiblemente preindoeuropees, los ástures, teníen como dioses proteutores a les fuercies de la Natura. Gracies a les referencies d'Estrabón sabemos qu'adoraben a la Lluna como a una diosa básica de lo espiritual y de la fertilidá, lu qu'afirma que yeren matriarcales ou en procesu de patriarcalización.
Conócense delles diviniaes pola toponimia y pola documentación romana y medieval que llegó ta nós. Dalgunes de les divinidaes que se saben yeren adoraes por esti pueblu son:
- Belenos, identificáu polos historiadores de l'Antigüedá con Apolo. Rellacionáu con él pue tar el topónimo de San Xuan de Beleño (Ponga).
- Cándamu: dios de la Vexetación y les Fontes, del que toma'l nome un conceyu asturianu. Entá esiste nel conceyu de Llión, nel parque natural de la Candamia una copia de la fonte dexada a Iove Candamus -Júpiter Cándamu- polos romanos en siñal de sincretismu.
- Lug: paez que ta rellacionáu coles poblaciones aceltizaes del centru y ocidente d'Asturies, tóponimos como'l de Llugones -averáu a Uviéu- muesen la esistencia d'esti proteutor.
- Taranis, deidá que los historiadores de l'antigüedá identificaron con Ares . Probablemente tengan rellación con él topónimos como Taranes (Ponga), Tarañu (Cangues d'Onís) Tarna (Casu) o Taraña (Llaviana y Siero)
- Telenón: dios de la Fuercia, el Rellumu o la Llucha. Vivía, según les creyencies ástures, nel actual monte Telenu -Lus Maragatus- y amás ésti ye ún de los símbolos del País Llionés.
- Deidaes menores: Había una pléyade de xenios o dioses menores que, seguramente, pasaron a la relixosidá de la cultura asturllionesa nes formes de sumiciu,xanes, llumies ou'l busgosu.
