Xuacu Amieva
De Uiquipedia
Xuacu Amieva (12 d'ochobre de 1954) ye un gaiteru asturianu nacíu en El Mazucu, Llanes. Maestru de gaiteros, distínguese pol so llabor de recuperación del patrimoniu cultural y musical asturianu, siendo fundador d'abondos grupos folklóricos y bandes de gaites. Tamién destaca la so creación musical, que ye reconocía a nivel mundial con premios de prestixu como'l Troféu Macallan del Festival Intercélticu de Lorient o'l Grammy.
Tabla de conteníos |
[editar] Biografía
La so vocación musical vien-y de familia, yá que so madre yera cantante de tonada y tenía parientes que tocaben la gaita. En 1974 entró a formar parte del grupu «Urogallos». Interesáu na música tradicional asturiana participa en delles agrupaciones folklóriques como «Raigañu», «Urogallos» y «Andecha Folklor d'Uvieu». Nellos fai un importante llabor de recuperación tanto de músiques como d'instrumentos populares como la bandurria, la gaita de rabil, la trompa o arpa de boca, la flauta travesera de madera, ...
Nel añu 1980 crea n'Uviéu la «Escuela de música tradicional», de la que más tarde tendría qu'abrir delegaciones n'otros puntos del Principáu debido a la gran demanda. Nestes escueles naceríen delles de les primeres bandes de gaites d'Asturies, como la Banda de los L.lumerinos o la Banda Gaites Naranco.
Arriendes d'esi trabayu d'enseñanza funda los grupos folk Beleño y Ubiña. En 1990 formó el grupu folk «Xuacu Amieva». En 1995 collabora colos irlandeses The Chieftains nel so discu Santiago tocando el tema "El besu". El discu obtendría nel añu 1997 el premiu Grammy.
Nel añu 2006 convirtióse nel presidente de la Xuntanza de Gaiteros Asturianos (XUGA), asociación na que s'amestaron les dos asociaciones de gaiteros que nesi momentu funcionaben n'Asturies.
[editar] Discografía
- Método de gaita (1984)
- Onde l'agua ñaz (1986)
- Ubiña (1988)
- Xostrando (1989)
- Collaboración en Las cornamusas de Europa (1991)
- Lluna caldeá (1992)
- La gaita asturiana (1993)
- Collaboración col tema El besu nel álbum Santiago de The Chieftains (1995)
- Tiempo de mitos (1999)
- al son del fueu (2003)
[editar] Llibros
- Método de gaita (1984)
- Método de gaita asturiana (1998)
- La gaita asturiana. Método interactivo de enseñanza (2003)
[editar] Curtiumetraxes
- Mitos astures (1997)
