Niedabaian
Aus Wikipedia
Niedabaian is oana vo de siebm Regierungsbezirke vo Baian. D'Haubdstod vom Regierungsbezirk Niedabaian is Landshut (ca. 60.000 Eiwohna). Da Regierungsbezirk bschded aus de Landkreise Kelheim, Landshut, Straubing-Bong, Dingolfing-Landau, Rottal-Inn, Regen, Degndorf, Freiung-Grafenau und Passau (vo West nach Ost) und außadem aus de greisfrein Stéd Landshut, Båssa und Straubing.
Inhaltsverzeichnis |
[dro wärkln] Geográfische Låg
Niedabaian ligd zwischn de Regierungsbezirke Obapfåiz (Hauptståd Rengschburg) und Obabaian (Hauptståd Minga) und grenzd an de Tschechei und Ästareich.
Geographisch: 11,5° bis 13,5° östliche Läng und 48° bis 49° nördliche Brerdn.
[dro wärkln] Physische Åsicht
Gebirg gibts in Niedabaian nur an Bairischn Woid, der a durchschnidliche Landeshäng vo 1000 m hod. De bekanntesdn Berng im Bairischn Woid hand da Einödriegel (1121 m), da Hirschnstoa (1095 m), da Pröller (1048 m), da Grouße Arba (1456 m), da Rachel (1453 m), da Lusen (1373 m) und da Brotjacklriegl (1016 m).
Desweng hand im Winda a vui Schifahra in de Landkreis Regen und Freiung, und a Degndoaf, Bassa und Straubing-Bogn. De Orte beim Groußen Arba (1456 m), am Rachel (1453 m) und am Lusen (1373 m) hand bekannd fiar eran Wintersport.
Erwähnenswerd is a da Landesabschnid undahoi da Doana, ungefähr vo Rengschburg bis Vuishofa, da so genannde Gaibon oda a Dungau. Weil da Bon durd so fruchdba is, wernd do haubdsächlich Zuggaruam obaud. In Blalleng (Plattling) und Rengschburg sand desweng Zuggaruamfabrikn, zu dena olle Gaibonbauan erane Zuggaruam hifohn miassn. Außadem wird sonsd a no Woaz, Gerschn, Gmias und Obsd obaud.
[dro wärkln] Gschicht
E da boarischn Vofassung vo 1808 homs Baian in Kreise eidoid. Da Kini Ludwig I. hod dann 1837 an "Unterdoanakreis", so hod des Gebied vom heidinga Niedabaian davor gheußn, in "Niedabaian" umdaft.
