Georg Forster
El Vikipedio
La germana natursciencisto kaj verkisto (Johann) Georg (Adam) FORSTER naskiĝis je la 27-a de novembro 1754 en Nassenhuben (nuntempe: Mokry Dwór en Pollando) kaj mortis je la 10-a de januaro 1794 en Parizo. Li estas konsiderata unu el la fondintoj de la vojaĝliteraturo.
La filo de la esploristo Johann Reinhold Forster jam kiel infano povis akompani sian patron dum esplorvojaĝoj. Post mallonga restado en Peterburgo, li kune kun sia patro en la jaro 1766 transloĝiĝis al Anglio kaj de 1772 ĝis 1775 ambaŭ partoprenis la duan mondvojaĝon de James Cook. En 1777 Georg Forster publikigis anglalingve la verkon A voyage round the world, kiu baziĝis sur la scienca taglibro de lia patro.
Ekde 1779 li estis profesoro en Kassel, ekde 1784 li okupis saman postenon en Vilno kaj ekde 1788 li laboris kiel bibliotekisto en Mainz. En la jaro 1790 li kune kun la juna Alexander von Humboldt vojaĝis tra Nederlando, Anglio kaj Francio. Siajn spertojn li priskribis en la verko Ansichten vom Niederrhein, von Brabant, Flandern, Holland, England und Frankreich (3 volumoj, 1791-94).
La politikaj interesoj de Georg Forster, kiu ekz. aktive subtenis la francan revolucion, rikoltis ne nur simpation. En Germanio rigardata kiel perfidulo, li en la jaro 1794 mortis kiel malriĉulo en Parizo.
