Aceite
Na Galipedia, a wikipedia en galego.
A palabra aceite (do árabe az-zait, o zume da oliva, e este do arameo zayta) é un termo xenérico para designar numerosos líquidos graxos de orixes diversas que non se disolven na auga e que teñen menos densidade ca esta. É sinónimo de óleo, do latín oleum, pero este termo emprégase só para os sacramentos da Igrexa Católica e na arte da pintura.
Orixinalmente designaba o aceite de oliva, pero a palabra xeneralizouse para denominar a graxas vexetais, graxas animais ou graxas minerais.
Índice |
[editar] Aceites combustibles
Os aceites combustibles son unha variedade de mesturas líquidas de cor amarelenta a parda clara provenientes do petróleo cru. Certas sustancias químicas que se encontran neles poden evaporarse doadamente, en tanto que outras poden disolverse máis doadamente en auga.
Son producidos por diferentes procesos de refinación, dependendo dos usos a que se designan. Poden ser usados como combustibles para motores, lámpadas, quentadores, fornos e estufas, tamén como solventes.
Algúns aceites combustibles comúns son o queroseno, o aceite diesel, o combustibles para avións a reacción, o aceite de cociña e o aceite para calefacción. Distínguense un dos outros pola composición de hidrocarburos, os puntos de ebulición, os aditivos químicos e os usos.
[editar] Aceites minerais
Emprégase esta denominación para aceites obtidos por refinación do petróleo e cuxo uso é o de lubricantes.
[editar] Aceites comestibles
Existen diversos aceites animais coma os aceites de balea, de foca ou de fígado de bacallao que chegaron a consumirse pero actualmente na cociña só se utilizan aceites vexetais, extraídos de sementes, froitas ou raíces. En xeral os aceites vexetais aportan ácidos graxos insaturados e son ricos en vitamina E. O seu valor enerxético é de 900 kcal cada 100 gr.
O aceite máis antigo probablemente sexa o de sésamo, sábese que o usaban os exipcios. Os gregos usaron aceite de oliva e en Atenas o oliveira era considerado unha árbore sagrada e foi símbolo da vida da cidade. Na Antigüidade o aceite servía para a alimentación, para a iluminación e para uso relixioso (os óleos para unxir).
[editar] Clasificación dos aceites
Pódense distinguir dous tipos de aceite, os virxes e os refinados. Os primeiros son os extraídos mediante unha presión en frío, estes conservan o sabor da froita ou semente da que son extraídos. Os principais aceites virxes que se comercializan son os de oliva e xirasol (inda que a maioría destes último son refinados), algúns de sementes como (colza, soia, pebidas de uva) ou dalgúns froitos secos (noz, améndoa, abelá).
Os aceites refinados son aqueles que se someten a un proceso (refinado) que permite obter un aceite que responde a certos criterios: organolepticamente é dun sabor neutro, visualmente está limpo e cunha cor adecuada, e amais é seguro alimentariamente e permite unha mellor conservación. Esta técnica úsase para modificar aceites que non son aptos para o consumo humano (aceite lampate, extraído do bagazo da oliva) ou para poder aumentar a produción de determinados produtos que, se fosen sometidos a unha simple presión en frío para obter un aceite virxe, non resultarían rendibles economicamente (sementes de xirasol).
Sóense utilizar mesturas de aceites virxes e refinados para aportar sabor e cor a estes últimos. O caso máis habitual é o do aceite de oliva. No caso do aceite de xirasol é estraño que se mesture.
