Communication
De Wikipedia, le encyclopedia libere
Le communication [kom-mu-ni-ka-tsión] es un parte del scientias social que tracta studiar le processos human de communication; isto es, le processos in le quales occurre un intercambio de ideas. Illo ha su radice in le parola latin communicare, que significa poner in commun.
Quanto al forma in que tal processos de communication occurre, il es possibile parlar de communication directe o interpersonal (conversation presential, incontro politic, etc.), e illo que occurre per un medio, como le posta (gastropodic o electronic) o le telephono, in le qual le communication occurre de forma interpersonal; o ben, per alcun medio massive, como le radio, le television, le medios imprimite, le cinema e le Internet (in alcunes de su modalitates como le Web, le Webcast, etc.).
Si le communication occurre de tal maniera que il ha un fluxo de information continue e in tempore real, on parla de communication synchrone. Al contrario, quando iste fluxos de information occurre con intervallos temporal (como occurre con le posta), on parla de un forma de communication asynchrone.
Iste juvene disciplina, parte del sociologia, le qual lo apporta le bases methodologic pro le prime studios interprendite de forma systematic secundo le principios del 20me seculo, quando se da le massivification del radio (le prime medio massive electronic de communication).
Ben que il es possibile parlar jam de communication massive desde le invention del Pressa de Gutenberg (vide tamben Pressa de imprimeria), il non es usque le decennio de 1920 quando se interprende le prime studios super le influentia del propaganda in le contexto del Europa ante le guerra, con le ascension del regimes fascista de Germania e de Italia. Anterior a iste prime passo del disciplina, on debe remitter se usque le grecos classic. Aristoteles in varie occasiones abbordava le thema del communication, ben que sin poter dar tono al fundation de un schola dedicate de maniera particular a iste disciplina.
Le scientias del communication expande un grande varietate de specialitates:
- communication massive,
- jornalismo,
- relationes public,
- communication organisational, etc.
Le objecto de studio del scientias del communication (le processos e phenomenos de communicacion), sovente es tamben abbordate per altere disciplinas. Inter illos es possibile mentionar:
- linguistica,
- sociologia,
- anthropologia social,
- cybernetica e
- psychologia, etc.
Inter le principal scholas o currentes theoric del communication se distacca:
Le functionalismo: un del prime currentes que surgeva in iste disciplina, e que cerca studiar le formas in que un determinate message produce un effecto super le audientia (stimulo e responsa). Le modello classic del “agulia hypodermic” pertine a iste schola, cuje postulatos jam ha essite superate. Illo pote situar se chronologicamente circa le prime 30 annos del 20me seculo.
Le schola de Frankfurt: currente critic con base in le theoria marxista, que se basa in le credentia que le formas symbolic (o messages) generate per le industria cultural ha como objectivo principal reproducer e perpetuar le modellos de domination capitalista. Illo surge in contraposition al functionalismo, circa le 1930s.
Le studios cultural: currente contemporanee que cerca analysar le processos de communication ab un perspectiva integral, considerante le emissores, receptores e le contexto in que se produce le phenomenos de communication. Le theoricos de iste currente sustene que, al reciper un message, le receptor pote facer tres lecturas o interpretationes de illo:
- le lectura dominante (reproducente le valores del emissor),
- le lectura negotiate (acceptante alcun aspectos ma rejectante alteres) o
- le lectura de negation (rejectante totalmente le contento del message recipite).
