Alþýðusamband Íslands

Úr Wikipediu, frjálsa alfræðiritinu

Merki ASÍ

Alþýðusamband Íslands (ASÍ) er heildarsamtök íslenskra stéttarfélaga, stofnað 12. mars 1916. Í dag eru meðlimir þess u.þ.b. 89 þúsund u.þ.b. helmingur starfandi vinnuafls. Forseti ASÍ er Grétar Þorsteinsson.

Listasafn ASÍ var stofnað 1961 í kjölfar þess að Ragnar í Smára, bókaútgefandi, gaf ASÍ listaverkasafn sitt.

[breyta] Saga

Upp úr aldamótunum 1900, eftir því sem fleira fólk flutti á mölina og Reykjavík þandist út og stækkaði tóku menn eftir því að hyggilegt væri að stofna félög til þess að gæta hagsmuna vinnandi fólks. Þegar fyrri heimsstyrjöldin skall á kom lægð í íslenskt efnahagslíf og þótti þá viturlegt að sameina nokkur verkalýðsfélög í eitt. Þann 12. mars 1916 var Alþýðusamband Íslands stofnað af sjö félögum á fundi í Báruhúsinu, þau félög voru;

Verkamannafélagið Dagsbrún
Hásetafélagið
Verkakvennafélagið
Prentarafélagið
Bókbindarafélagið
Verkamannafélagið Hlíf
Hásetafélag Hafnarfjarðar

Stofnmeðlimir voru um 1500 manns, um fjórðungur voru konur en þær höfðu aðeins ári fyrr hlotið kosningarétt, sem var þó takmarkaður. Samhliða stofnun ASÍ var Alþýðuflokkurinn, sem var stjórnmálaarmur þess, einnig stofnaður. Á stofnþinginu var Ottó N. Þorláksson kosinn forseti sambandsins, varaforseti varð Ólafur Friðriksson og Jón Baldvinsson ritari. Gegndu þeir þessum embættum þar til haldið var fyrsta reglulega þing ASÍ síðar sama ár. Þá tók Jón Baldvinsson við sem forseti og Jónas Jónsson frá Hriflu tók við embætti ritara.

Árið 1940 var Alþýðuflokkurinn aðskilinn frá ASÍ svo að verkalýðsfélagið gæti höfðað til allra vinnandi stétta óháð stjórnmálaskoðunum þess. Þó sneri ASÍ aftur á braut stjórnmálanna 1955 þegar ákveðið var á stjórnarfundi að stofna á ný stjórnmálaflokk, Alþýðubandalagið.

Í kjölfar hlerunarmálsins svokallaða, sem komst upp haustið 2006, að tilteknir símar hefðu verið hleraðir af lögregluyfirvöldum á meðan kalda stríðinu stóð, kom í ljós að sími skrifstofu ASÍ var hleraður að beiðni dómsmálaráðuneytisins í febrúar 1961.[1]

[breyta] Aðildarfélög

Aðildarfélög telja 82 talsins og er skipt niður í sex landsambönd að fimm félögum undanskildum.

Landsambönd	Félög með beina aðild
Landsamband íslenzkra verzlunarmanna MATVÍS, matvæla- og veitingasamband Íslands Rafiðnaðarsamband Íslands Samiðn, samband iðnfélaga Sjómannasamband Íslands Starfsgreinasamband Íslands	Félag íslenkra hljómlistarmanna Félag Leiðsögumanna Flugfreyjufélag Íslands Mjólkurfræðingafélag Íslands Félag bókagerðarmanna

[breyta] Starfsemi

Miðstjórn ASÍ sér um daglegan rekstur, hún er kosin ár hvert á ársfundi ASÍ til tveggja ára í henni sitja 13 fulltrúar auk forseta og varaforseta. Annað hvert ár er forseti kosinn sérstaklega og sex meðstjórnendur, en hitt árið varaforseti og sjö meðstjórnendur.

Auk þess eru kosnir ellefu varamenn. Sex það árið sem forseti er kjörinn og fimm það árið sem varaforseti er kjörinn.

Seturétt á ársfundi eiga samtals 290 ársfundarfulltrúar og eru þeim sætum skipt milli landsambanda og landsfélaga í hlutfalli við fjölda félagsmanna þeirra. Þó er hverju aðildarfélagi tryggður a.m.k. einn fulltrúi.