Darwin (Ástralía)
Úr Wikipediu, frjálsa alfræðiritinu
Darwin er höfuðborg Norður-svæðisins í Ástralíu. Þar búa rúm hundrað þúsund manns, tæpur helmingur þeirra sem búa á svæðinu. Borgin er staðsett á norðurströndinni við Tímorhaf. Skipverjar á könnunarskipinu H.M.S. Beagle voru fyrstir Evrópumanna til að sjá hafnarstæðið sem borgin liggur við árið 1839, og nefndu höfnina Darwin eftir Breska vísindamanninum Charles Darwin en hann hafði silgt með skipinu og gert miklar rannsóknir, þar á meðal hinn fræga samanburð á lífríki Galapagoseyja. Það var árið 1869 sem 135 manns stofnuðu þar byggð á vegum suður-ástralskra yfirvalda, en Norður-svæðið tilheyrði Suður-Ástralíu á þeim tíma. Sú byggð var nefnd Palmerston og það var ekki fyrr en 1911 þegar svæðið hlaut sjálfstæði frá Suður-Ástralíu að borgin fékk opinberlega nafnið Darwin. Í seinni heimsstyrjöldinni, árið 1942, gerðu Japanir loftárás á borgina og létust 243 af 2000 íbúum borgarinnar á þeim tíma. Árið 1974 eyddist svo meirpartur borgarinnar í fellibylnum Tracy og 50 manns létust. Borgin byggðist þó upp á enn á ný og er nú fjölmennari en nokkru sinni fyrr. Stærstu atvinnuvegir borgarinnar eru þjónusta við ferðamenn og námagröftur. Þar er líka stór herstöð sem hefur stækkað mjög á undanförnum árum vegna þátttöku Ástralíuhers í friðargæslu á Austur-Tímor. Þrátt fyrir smæð er Darwin afar fjölmenningarleg borg. Hún hefur einstaklinga af 75 mismunandi þjóðernum, og um fjórðungur íbúanna eru frumbyggjar eða Torressundseyjaskeggjar. Þar er eini háskóli Norður-svæðisins, Charles Darwin háskóli.
| Áströlsk fylki, svæði og höfuðborgir: |  |
|||||||
|---|---|---|---|---|---|---|---|---|
| Höfuðborgarsvæði Ástralíu | Nýja Suður Wales | Norður-svæðið | Queensland | Suður-Ástralía | Tasmanía | Victoria | Vestur-Ástralía | |
| Canberra | Sydney | Darwin | Brisbane | Adelaide | Hobart | Melbourne | Perth | |
| Norfolkeyja | Jólaeyja | Kókoseyjar | Kóralhafseyjasvæðið | Heard- og McDonaldeyjar | Ástralska suðurskautssvæðið | ||||||||
