Las Vegas
Úr Wikipediu, frjálsa alfræðiritinu
Las Vegas er stærsta borg Nevada fylkis í Bandaríkjunum. Borgin er aðallega þekkt fyrir fjölda spilavíta. Í borginni búa 534.847 (1. júlí 2004) en ef nærliggjandi svæði eru talin með búa þar um 1,7 milljón manns. Las Vegas er stjórnaraðsetur Clark-sýslunnar. Nafnið Las Vegas er oft látið ná yfir önnur svæði Clark-sýslunnar sem umlykja borgina. Þannig er hin 7,25km langa aðalgata borgarinnar, Las Vegas Boulevard, að mestu utan borgarmarka Las Vegas eða í bænum Paradise.
Las Vegas er einn af vinsælustu ferðamannastöðum heims og ferðast árlega um 37 milljónir þangað. Einn fjórði hluti ágóðans af ferðamönnunum er talinn falla í spilavíti en þrír fjórðu í aðgöngumiða á sýningar, minjagripi og lúxusvörur.
Fyrir utan spilavítin eru það aðallega hinar mörgu sýningar sem eru einkennandi fyrir borgina. Listamenn sem starfa eða störfuðu í Las Vegas eru m.a. Elvis Presley, Tom Jones, Frank Sinatra og Céline Dion. Þá eru sérstaklega margar brúðkaupskapellur í borginni, sem orsakast af því að lög um hjúskaparstofnun (og hjúskaparslit) eru sérlega einföld. Þannig gifta um 150 manns sig í Las Vegas á hverjum einasta degi.
Borgin er stundum kölluð Sin City vegna mikilla (og löglegra) fjárhættuspila, mikils framboðs á áfengum drykkjum allan sólarhringinn, margvíslegs framboðs á erótískum skemmtunum og lögleiðingu vændis í nærliggjandi sýslum. Stjórnvöld og ferðamálafrömuðir svæðisins styðja aftur á móti nafngiftina The Entertainment Capital of the World (skemmtanahöfuðborg heimsins)
Efnisyfirlit |
[breyta] Saga borgarinnar
| Las Vegas Fólksfjöldaþróun [1] |
|
| 1930 | 5.165 |
| 1940 | 8.422 |
| 1950 | 24.624 |
| 1960 | 64.405 |
| 1970 | 125.787 |
| 1980 | 164.674 |
| 1990 | 258.295 |
| 2000 | 478.434 |
Fyrsta byggðin á Las Vegas svæðinu komst á fót árið 1854 fyrir tilstuðlan mormónakirkjunnar, en byggðin var yfirgefin þremur árum seinna. Um miðjan 7. áratug 19. aldar byggði bandaríski herinn Fort Baker virkið á þeim stað sem Las Vegas er nú. Vegna vatnslinda sinna varð Las Vegas að mikilvægum áningarstað fyrir vagnlestir og lestir á leið milli Kaliforníu í vestri og New Mexico í austri. 1903 seldi ekkjan Helen Stewart fyrir 55 þúsund dollara stóran hluta af búgarði sínum til járnbrautafyrirtækis, sem aftur á móti seldi sama landið 15. maí 1905 fyrir 265 þúsund dollara til áhættufjárfesta. Borgin Las Vegas telst opinberlega stofnuð þennan dag. Hornsteinar hins hraða vaxtar Las Vegas voru lögleiðing fjárhættuspils 1931 og bygging Hoover stíflan 1931-1935. Mafíuforinginn Bugsy Siegel byrjaði á 5. áratugnum að byggja hótel með innbyggðu spilavíti og setti þar með af stað þróun sem hefur haldist fram til dagsins í dag. Athafnamaðurinn Howard Hughes bolaði mafíunni burt úr borginni milli þess sem hann keypti upp eignir í borginni.
[breyta] Þekkt hótel og kennileiti
Hótel setja mikinn svip á Las Vegas og eru þau gjarnan samtvinnuð við spilavítin. Las Vegas hefur fleiri hótel en nokkur önnur borg og það tæki mann 288 ár að gista eina nótt í hverju einasta hótelherbergi.
- Aladdin Hotel
- Bellagio
- Hótel Bellagio er aðallega þekkt fyrir Fountains of the Bellagio, stóran gosbrunn sem gýs á hálftíma fresti með meðfylgjandi tónlist. Þá var hótelið aðalvettvangur kvikmyndarinnar Ocean's Eleven.
- Caesars Palace
- Circus Circus Hotel
- Excalibur Hotel
- Golden Gate Hotel
- Golden Nugget
- Luxor
- Mandalay Bay
- Mirage
- MGM Grand Hotel
- MGM Grand Hotel er næststærsta hótel heims.
- Monte Carlo Resort
- New York New York Hotel
- Paris Las Vegas
- Við hótelið Paris Las Vegas stendur mjög nákvæm eftirgerð í hálfri upprunalegri stærð af Eiffelturninum í París.
- Stratosphere Las Vegas (Stratosphere Tower)
- Treasure Island
- Venetian Resort Hotel
- Wynn Las Vegas
[breyta] Þekktir einstaklingar frá Las Vegas
- Andre Agassi, tennisspilari
- Charisma Carpenter, leikkona
- Daveigh Chase, leikkona
- Thomas Alexander Dekker, leikari
- Veronica Hart, klámmyndaleikkona, leikkona, framleiðandi, handritahöfundur og leikstjóri
- Jenna Jameson, klámmyndaleikkona og klámmyndaframleiðandi
- Jack Kramer, fyrrv. tennisspilari
- Pat Morita, leikari
- Ne-Yo, R&B söngvari og lagahöfundur
- Panic! At The Disco, Fræg rokk hljómsveit
