Ashcan

Vu Wikipedia, der fräier Enzyklopedie.

Ashcan oder Camp Ashcan (en. fir Dreckskëscht) war de Codenumm vun engem deemools geheim gehalenen alliéierte Gefaangenelager ënner amerikanescher Féierung (offiziell: Central Continental Prisoner of War Enclosure No. 32), um Enn vum Zweete Weltkrich, dat zu Munneref am Palace Hôtel ageriicht gi war. Hei goufen tëschent dem Mee an dem September 1945 bal all déi bis dohinner gefaangen Nazigréissten an héichrangeg däitsch Militär festgehalen, fir verhéiert ze ginn, ier se op Nürnberg bruecht goufen, wou se virun d'Krichsverbriechertribunal koumen.

Ënnert de 86 Gefaangene waren eng ettlech vun den nach liewege Nazibonzen: de Reichsmarschall Hermann Göring, de Julius Streicher, Editeur vum antisemitesche Stürmer a Gauleiter, de Robert Ley, Chef vun der Arbeiterfront, den Ausseminister Joachim von Ribbentrop an de Walther Funk, President vun der Reichsbank. Och e groussen Deel vun der Militärféierung sutz hei: de Generalfeldmarschall Wilhelm Keitel, de Generaloberst Alfred Jodl, de Grossadmiral Karl Dönitz, de Feldmarschall Albert Kesselring, an de von Rundstaedt.

Zu Frankfurt gouf et zur selwëschter Zäit en änlecht Lager, Dustbin genannt (wat och Dreckskëscht heescht), dat ënner britescher Féierung stung, an an deem déi éischter "technesch" Kollaborateure vum Naziregime, dorënner den Albert Speer, op hire Prozess gewaart hunn.

An der Ashcan waren d'Prisonnéier um 3. a 4. Stack ënnerbruecht, den 2. Stack war eidel, d'Amerikaner haten sech um Rez-de-Chaussée ageriicht. Déi Gefaange kunnte fräi ronderemgoen, se kunnten esouguer eraus an de Park (ronderëm deem natirlech pickegen Drot a Waachposte waren) a fräi matenee schwätzen. Dat war express esou gewollt, fir dass en se méi gespréicheg bei de Verhéier sollte ginn.

5 amerikanesch Intelligence Officer hu vun der Nazi Warcrime Commission regelméisseg Questionnairë geschéckt kritt, mat deenen se d'Prisonnéier ausgefrot hunn. Ee vun de Verhéierer war den John Ernest Dolibois, e gebiertege Bouneweger, dee spéider amerikaneschen Ambassadeur zu Lëtzebuerg sollt ginn. Hien huet d'Roll vum "Wellfare officer" gespillt, deen sech ëm d'Wuelergoe vun deenen "héigen Häre" sollt këmmeren. Dëst huet him erméiglecht, wäertvoll Informatiounen an Témoignagen ze sammelen, well déi Gefaange mam géigesäitege Beschass net gespuert hunn. Besonnesch d'Militär op der enger Säit an d' pur-et-dur Nazien op där anerer haten et openee sëtzen. Verschiddener wollten sech wichteg maachen, anerer ware schlau genuch, ze probéieren, hir Roll méi onwichteg ze maachen, wéi se war.

Ganz kunnten d'Amerikaner iwwregens net geheim halen, wat hannert dem pickegen Drot verstoppt war: Munnerefer Zäitzeie verzielen, als Kanner do an der grousser Vakanz ronderëmgeschlach ze sinn, fir, wé si et genannt hunn, "Göringen ze kucken".

Nodeems d'Prisonnéier am September 1945 op Nürnberg bruecht gi waren, gouf d' Camp Ashcan opgeléist. E puer Jorzéngte laang huet d'Gebai nach als Hotel gedingt, 1988 gouf et dunn ofgerappt, fir dem moderen Domaine Thermal Plaz ze maachen.