Colette Flesch
Vu Wikipedia, der fräier Enzyklopedie.
D'Colette Flesch (* 16. Abrëll 1937 zu Diddeleng) ass eng lëtzebuergesch Politikerin.
Si huet an de Vereenegte Staaten Economie a Politikwëssenschaften studéiert.
An de 60er Joren huet d'Colette Flesch Lëtzebuerg dräi Mol op den Olympesche Spiller bei de Competitiounen am Fechten vertrueden: 1960 zu Roum, 1964 zu Tokyo an 1968 zu Mexico Stad. Si gouf 1967 lëtzebuergesch Sportlerin vum Joer.
Vun 1964 bis 1969 war d'Colette Flesch Verwaltungsrot am Sekretariat vum Conseil vun den Europäesche Communautéiten.
Mat nëmmen 33 Joer gouf si 1970 Buergermeeschtesch vun der Stad a blouf dat bis 1980.
Op der Lëscht vun der Demokratescher Partei (DP) gouf si tëscht 1969 an 1980, an tëscht 1984 an 1990 an d'Chamber an an d'Europäescht Parlament gewielt. D'Colette Flesch war Generalsekretärin (1977-1980) a Presidentin (1980-1989) vun der DP. Si ass och eng Zäit laang Presidentin vun der Europäescher Federatioun vun de Liberalen, Demokrateschen a Reformparteien gewiescht.
Vun 1980 bis 1984 war d'Colette Flesch an der Regierung vum Pierre Werner Vize-Premièreministesch, Ausseministesch, a Ministesch fir Aussenhandel, Cooperatioun, Wirtschaft, Kleng- a Mëttelbetriiber a Justiz.
Tëschent 1990 an 1999 war d'Colette Flesch General-Direktesch an der Europäescher Commissioun, zoustänneg fir Kultur an Informatioun, dono fir den Iwwersetzerdéngscht.
Vun 1999 bis 2004 war si nees Member vum Europäesche Parlament. Zënter 2004 ass si Deputéiert an der Chamber a Schäffe vun der Stad Lëtzebuerg.
D'Colette Flesch ass "gepacst".
[Änneren] Kuckt och
- Lëscht vun de lëtzebuergesche Politiker
- Lëscht vun de lëtzebuergeschen Europa-Deputéierten
- Demokratesch Partei
- Lëscht vu lëtzebuergeschen Olympioniken
- Lëtzebuergesch Sportler vum Joer
| Virgänger: Paul Wilwertz |
Buergermeeschtesch vun der Stad Lëtzebuerg 1970- 1980 |
Nofolger: Camille Polfer |
